Nëse ju keni apo do krijoni një faqe zyrtare në Facebook, atëherë ky shkrim do t’ju ndihmojë të kuptoni si t’i shfrytëzoni më mirë elementët kryesorë të faqes për të promovuar me lehtësi punën tuaj nëpërmjet Facebook-ut.

Konkretisht do të flas shumë shkurt për:

• imazhin ballor (banner-it),
• foton e profilit
• rreth nesh (përshkrimi)
• butonat (menuja e brendshme) dhe
• postimet e ndryshme brenda faqes tuaj (timeline).

Imazhi ballor (banner-i)

Gjëja e parë që shohin vizitorët e faqes tuaj në Facebook është pikërisht imazhi ballor ose “banner-i” siç njihet ndryshe.

Ky imazh është fytyra kryesore për ju në Facebook dhe si e tillë duhet të shprehë vizualisht identitetin dhe seriozitetin e vetë faqes, ndaj duhet përdorur dhe shfrytëzuar me kujdes.

“Imazhi ballor” është lehtësisht i ndryshueshëm dhe sugjerohet përdorimi i fotove/imazheve me cilësi të mirë.

Ju mund ta përdornin dhe ndryshoni këtë imazh sipas rastit dhe nevojës për synime si p.sh.:

• promovimi i identitetit/funksionit të faqes
• promovimi i aktiviteteve/nismave/produkteve/shërbimeve të caktuara
• dhe sigurisht edhe zbukurimi estetik i vetë faqes.
• Etj.

Foto e profilit

“Foto e profilit” të faqes tuaj është në funksion e njëjtë me foton e profilit tuaj personal në Facebook, por që në këtë rast duhet zëvendësuar me logon ose një imazh i cili identifikon biznesin/organizatën tuaj. Kjo foto do të shfaqet sa herë që ju postoni diçka të re dhe rrjedhimisht do t’ju identifikojë kur postimi juaj do të shfaqet edhe në profilet e fansave tuaj.

• Lehtësisht e ndryshueshme
• Shoqëron çdo postim/shkrim që ju publikoni në faqen tuaj ose kudo tjetër në Facebook
• Identifikon autorin e postimeve dhe rrit vlerën e profilit të faqes tuaj.

Rreth Nesh (About)

Kjo hapësirë shërben si një mundësi për një prezantim më të qartë të faqes si dhe biznesit/organizatës që përfaqëson.

• Duhet një hyrje e shkurtër dhe e saktë.
• Duhet të përshkruajë biznesin/organizatën tuaj.
• Mund të përdoret për të vendosur moton apo sloganin tuaj (ndonëse këto mund të shprehen edhe vizualisht te imazhi ballor)

Butonat – Apps (menuja e brendshme)

“Butonat” shërbejnë si linke të shkurtra për aplikacionet e brendshme (apps), por unë preferoj t’i konsideroj si menu të brendshme për seksione të ndryshme të faqes tuaj që ndihmojnë në promovimin e mëtejshëm të faqes dhe  aktivitetit tuaj. Ato mund të shtohen sipas funksioneve dhe nevojës tuaj.

Disa janë të gatshme por ka edhe plot funksione (aplikacione) të tjera të cilat kërkojnë një nivel më të avancuar teknik për t’u implementuar me sukses.

Disa prej funksioneve/aplikacioneve kryesore përfshijnë:

• Fotot (krijohet automatikisht kur ngarkoni foto)
• Videot (krijohet automatikisht kur ngarkoni video)
• Shënimet (krijohet automatikisht kur i shtoni ju)
• Link direkt për faqen tuaj zyrtare www.kompania.com (mund të shtohet manualisht)
• Aplikacione të tjera për fushata, aktivitete, promovime, etj. (mund të shtohen vetë sipas nevojës dhe njohurive teknike)
• Etj.

Fotot

Për sa i përket përdorimit të fotove në faqen tuaj, unë sugjeroj:

• Përdorini rregullisht pasi preferohen më shumë se sa shkrimet në Facebook
• Vendosni përshkrime të sakta dhe të qarta për çdo foto
• Krijoni albume fotosh (nëse keni më shumë se një)

Videot

• Sugjerohet t’i ngarkoni të plota brenda Facebook (kjo bën që të aktivizohet butoni i Videove)
• Mund t’i ngarkoni në YouTube dhe pastaj t’i postoni edhe në Facebook
• Sugjerohet t’i shoqëroni me përshkrime të sakta dhe të qarta (njësoj si me fotot)

Shënimet

Nëse keni tekste më të gjata të cilët dëshironi t’i publikoni brenda faqes tuaj në Facebook, atëherë një metode shumë praktike do ishte përdorimi i shënimeve (notes).

Publikimi i teksteve të gjata si “shënime” bën që brenda faqes tuaj të krijohet një seksion i ri të cilës vizitorët tuaj mund t’i referohen në çdo kohë.

Shënimet ju lejojnë që ta postoni të njëjtin tekst edhe në të ardhmen duke përdorur linkun e shënimit, pra pa pasur nevojë ta postoni të gjithë tekstin.

Linku direkt

Nëse ju keni një faqe zyrtare (si p.sh. www.kompaniajuaj.com apo www.organizatajuaj.org, etj.) atëherë vendosja e një butoni i cili shërben si link direkt për te faqja juaj, ju ndihmon ta dalloni edhe faqen tuaj në Facebook si faqe zyrtare. Thënë ndryshe, nëse ka disa faqe të tjera që janë krijuar në Facebook me emrin e organizatës/kompanisë tuaj, atëherë vendosja e një “linku direkt” në faqen tuaj të Facebook ju ndihmon ta dalloni atë nga të gjitha faqet e tjera me emër të njëjtë.

Disa prej klientëve të mi (përfshi këngëtarë dhe organizata) e kanë shumë të nevojshëm dallimin e faqes së tyre në Facebook nga faqet e tjera me të njëjtin emër. Krijimi i këtyre butonave me “link direkt” për të faqja juaj, ju ndihmon që ta dalloni faqen tuaj zyrtare në Facebook nga gjithë të tjerat.

Aplikacione të tjera (si butona)

Aplikacione të tjera që mund të përdoren si butona në faqen tuaj në Facebook përfshijnë

• lojra,
• linke direkte për faqe të tjera (si p.sh shërbime, produkte, etj.)
• video, foto, aplikacione të bëra enkas për ju
• etj.

Implementimi i butonave të tjerë si aplikacione brenda faqes tuaj zakonisht kërkon një nivel më të lartë njohurish teknike, por me zhvillimin e teknologjisë dhe vetë kërkesave të përdoruese, shumë prej këtyre aplikacioneve mund implementohen nga çdokush.

Postimet në Timeline

Timeline është hapësira horizontale kohore në të cilën shfaqen postimet e ndryshme që ju bëni në faqen tuaj. Ajo është hapësira ku vizitorët futen për të parë aktivitetin e faqes tuaj sipas renditjes kohore në të cilën janë publikuar.

Ndërkohë, “postimet” janë mënyra kryesore e publikimit të materialeve të ndryshme në faqe (si foto, video, imazhe, etj.).

Nisur nga mënyra se si shumica e përdoruesve të Facebook e përdorin këtë shërbim, sugjerohet që postimet tuaja

• të jenë shkrime të shkurtra
• të shoqëruara gjithnjë grafikisht me nga një foto/video apo diçka tjetër ilustruese.
• të shpeshta
• të rregullta
• mund të përsëriten
• mund të bëhen share edhe në faqe/profile të tjera
• etj.

Një sugjerim tjetër lidhet me shpeshtësinë  dhe oraret e publikimeve tuaja. Praktikat më të mira kanë treguar që sa më shpesh të postohet aq më shumë rritet edhe ndërveprimi në faqe, por kjo nuk nënkupton vetëm publikime por edhe përgjigje ndaj komenteve të vizitorëve tuaj e shumë gjëra të tjera.

Sqarim: Faqet e përdorura si shembuj për këtë shkrim janë faqe të cilat administrohen nga autori.

Zbuloni oraret më të përshtatshme të ditës se kur duhet të postoni online shkrimet tuaja në Blog, apo në Facebook dhe Twitter.

Nëse synimi juaj është që të arrini një numër më të madh lexuesish apo vizitorësh online, hulumtimet tregojnë se duhet të filloni të konsideroni oraret më të përshtatshme për të publikuar online. Thënë ndryshe, nëse nuk e keni menduar ndonjë se si oraret e ditës ndikojnë në suksesin e punës tuaj online, atëherë tani mund ta përmirësoni më tej edhe këtë aspekt të marketingut që bëni në faqen/blogun tuaj si dhe për postimet nëpër rrjetet sociale si Facebook dhe Twitter.

Ekspertët dhe statistikat e mbledhura tregojnë se lexueshmëria e postimeve tuaja varen jo vetëm nga cilësia dhe interesi i lexuesve për atë çfarë keni shkruar, por edhe nga koha apo orët e ditës gjatë të cilave zgjidhni të postoni me qëllim arritjen e një audience sa më të madhe.

Ky shkrim bazohet mbi hulumtimet statistikore të bëra nga një kompani e mirënjohur marketingu online dhe disa ekspertëve të marketingut online, bazuar mbi të dhënat e mijëra përdoruesve në Amerikë dhe nëpër botë. Rezultatet e përbashkëta nxjerrin në pah disa vëzhgime interesante mbi oraret si dhe ditët më të përshtatshme që ndikojnë pozitivisht në arritjen e një audience më të madhe lexuesish nëpërmjet Blogut, Facebookut dhe Twitter, të cilat përfaqësojnë tre prej kanaleve/platformave më përfaqësuese për median sociale dhe marketingun online.

E sqarojmë që në fillim se hulumtimet bazohen në një pjesë të madhe mbi statistikat e përdoruesve në Amerikë (pra i referohet orareve të ditës për këto përdorues) por që lehtësisht i aplikohen edhe lexuesve në Shqipëri e jo vetëm. Mbi të gjitha, besoj se është e barazvlefshme edhe për ju që jeni të interesuar të kuptoni oraret më të përshtatshme për lexuesit tuaj shqipfolës, të cilët sigurisht nuk bëjnë shumë dallim për sa i përket orareve gjatë të cilave e përdorin internetin.

Mëngjesi më i përshtatshëm për postimet në Blog/faqe pastaj në Facebook

Sipas studimit, koha më e përshtatshme për publikimin e postimeve në faqen apo blogun tuaj është mëngjesi. Më konkretisht, shumica e leximeve të postimeve/shkrimeve nga lexuesit ndodhin gjatë orëve të para të ditës me një prirje në rënie për orët e tjera të ditës, ku mbrëmja dhe nata kanë lexueshmërinë më të ulët.

Si rrjedhojë, sipas hulumtimit, sugjerohet që shkrimet në faqen/blogun tuaj t’i bëni herët në mëngjes (7:00 dhe 11:00 AM) dhe ndërkohë postimet dhe shpërndarjet në Facebook si dhe postimet e tjera që mund të bëni në Facebook të kryhen rreth orëve 8:00 dhe 10:00 AM.

Në varësi të platformës që përdorni për faqen tuaj, ju mund ta skeduloni publikimin e postimeve në faqen/blogun tuaj që një ditë më përpara me qëllim që ato më pas të vetë-publikohen herët në mëngjes. Në të njëjtën mënyrë, ju mund të bëni edhe vetë-publikimin e postimeve tuaja në Facebook në orët e mëngjesit dhe gjatë ditës në vijim.

Hulumtimi tregon se kur ju postonit në Facebook në orët e sipërpërmendura, gjasat janë më të larta që postimi juaj do të shihet apo do të shpërndahet më tepër, por Facebook-u ka edhe një orë tjetër të përshtatshme që është ora 6-7 PM e mbasdites.

Gjithashtu, dita kur njerëzit shpërndajnë më shumë postime nëpër Facebook është e shtuna, por që fillon që të premten dhe mbaron të dielën në mëngjes herët.

Mbas-dreka dhe mbrëmja më të përshtatshme për Twitter-in

Hulumtimi nxjerr në pah se koha më e përshtatshme për përdorimin e Twitter është mbas-dreka dhe mbrëmja, periudha të cilat rezultojnë në më shumë lexime, ri-lexime dhe shpërndarje (retweets).

Dita më e përshtatshme e javës për të publikuar

Është normale që shumica prej nesh nuk ka mundësi të publikojë diçka çdo ditë në blog apo faqen online, ndaj besoj se është me interes edhe rezultati tjetër i hulumtimit i cili nxirrte në pah se ditët me lexueshmërinë më të lartë janë e enjtja dhe e premtja. Ndërkohë që e shtuna ka një rënie drastike vizitash krahasimisht me dy ditët pararendëse.

Ndërkohë, që për Facebook-un ditët më të përshtatshme janë e shtuna dhe e diela, që në pamje të parë tregojnë një prirje të njerëzve për të konsumuar gjëra më të lehta dhe të shkurtra në fundjave në krahasim me shkrimet apo postimet më të gjata që mund të bëhen të enjteve dhe të premteve në faqen/blogun tuaj.

Konkluzione shtesë

Një nga këshillat që unë lë gjithnjë me klientët e mi është fakti se mënyra më e mirë për të vërtetuar se cilat janë oraret dhe ditët më të përshtatshme për të publikuar online varen plotësisht nga lexuesit tuaj. Ndaj, nuk ju ngelet veç se ta testoni dhe provoni vetë. Interneti dhe platformat e marketingut online si Blogu dhe Facebook ju lejojnë që edhe nëse e bëni gabim diçka, të mund ta përmirësoni sërish duke vëzhguar dhe mësuar nga çdo eksperiencë e re.

Gjithashtu, nëse lexuesit tuaj janë mësuar që shkrimet apo postimet tuaja t’i marrin në një ditë apo orar të caktuar, atëherë nuk është e nevojshme të ndryshoni pasi kështu mund të krijoni konfuzion.

Oraret dhe ditët më të përshtatshme nuk vlejnë gjithnjë për marketingun me email, pasi siç e përmenda, klientët tuaj mund të jenë mësuar ndërkaq me skedulën tuaj të publikimeve si dhe vetë natyra e email-it është e tillë që mund të konsumohet gjatë gjithë ditës.

Për më tepër, oraret e pikut mund të jenë më të mirat për shumicën e lexuesve, por ato gjithashtu nënkuptojnë që lexuesit tuaj mund t’i kushtojnë më pak kohë postimeve tuaja pasi në të njëjtën kohë janë duke lexuar edhe postimet e tjera që konsumohen gjatë të njëjtës periudhë të ditës.

Mbi të gjitha, gjetja e orarit të përshtatshëm, nuk duhet të zëvendësojë asnjëherë nevojën për të publikuar materiale cilësore dhe me interes për lexuesit tuaj. Cilësia dhe interesi, janë padiskutimisht dy nga faktorët parësor për suksesin e çdo publikimi online, pasi ndryshe lexuesit tuaj do fillojnë të zgjedhin dikë tjetër.

Burimet:

https://www.aweber.com/blog/email-marketing/targeting-timing-for-content.htm

https://www.problogger.net/archives/2010/12/06/ëhens-the-best-time-to-publish-blog-posts/

https://danzarrella.com/infographic-how-to-get-more-likes-comments-and-shares-on-facebook/ (linku i vjeter nuk funksionon)

Marketingut me email mbetet një nga mënyrat më kost-efektive të reklamimit online e cila ju ndihmon të krijoni një marrëdhënie të vazhdueshme dhe afat-gjatë me klientët tuaj. Por, si çdo formë tjetër marketingu, ajo mund të abuzohet! Nëse marketingu me email bëhet siç duhet atëherë ai ju lejon ta shfrytëzoni edhe më mirë bazën ekzistuese të klientëve që ju keni, duke forcuar më tej stabilitetin e vetë biznesit tuaj si dhe rritur mundësinë e gjetjes së klientëve te rinj. Por ju sqarojmë se ky shkrim ka për synim të evidentojë një nga mënyrat kryesore të abuzimit me këtë lloj marketingu ndaj nxjerrja në pah e disavantazheve nuk është një reflektim mbi këtë lloj marketingu, por vetëm ndaj formave abuzive.

Në kontekstin e bizneseve shqiptare, parimisht është mjaft pozitiv fakti që përdorimi i “Email Marketing” për dërgimin e mesazheve promocionale nga bizneset ka njohur një rritje të ndjeshme këto vitet e fundit. Kjo mund të shihet qartë edhe nga mesazhet që marrim të gjithë nëpër inbox-et tona. Por shumica e këtyre mesazheve duhet të themi që janë thjesht abuzive.

Tundimi për t’u dërguar një mesazh promocional 100 mijë apo 500 mijë adresave shqiptare është real për shumë biznese! Në pamje të parë kjo strategji marketingu për gjetjen e klientëve potencialë duket shumë e arsyeshme pasi kosto për çdo adresë është shumë më e ulët se sa ajo për printimin e fletushkave apo revistave që vendosen derë-më-derë.

Por abuzimi me përdorimin e listave të gatshme për dërgimin e mesazheve reklamuese me email në adresat e shqiptarëve rrit ndjeshëm edhe rastet kur mesazhet tuaja promocionale përfundojnë në dosjen e “SPAM-it” apo “BULK Mail”.

Kjo është më se normale pasi këto lloj fushatash promocionale janë në fakt mesazhe të “pa aprovuara” nga marrësit, pra janë pikërisht ato që kategorizohen si SPAM! Kushdo që ka një adresë email personale apo pune, e kupton shumë mirë se sa të padëshirueshëm janë mesazhet SPAM të cilat mbushin inbox-et tona me reklama për produkte apo shërbime që shumë shpesh nuk na interesojnë fare.

Konkretisht, të paktën 95% e mesazheve SPAM (pra të pa kërkuara nga ne) që vijnë në inbox-et tona janë plotësisht në kundërshtim me dëshirat apo nevojat tona. Por gjithsesi, ka mjaft biznese të cilat vazhdojnë t’i shfrytëzojnë këto lloj formash komunikimi me adresa abonentësh të cilët nuk kanë kërkuar t’u dërgohet një mesazh.

Pse mesazhet abuzive dëmtojnë edhe biznesin tuaj?

Por megjithëse dërgimi i një mesazhi promocional mund të kushtojë vetëm 100 euro për 100 mijë adresa/marrës, kosto e vërtetë për biznesit është disi më e lartë dhe nuk mbulohet dot nga këto lloj reklamash, përkundrazi rritet prej tyre!

Para se t’ju sugjerojmë disa zgjidhje për nevojat tuaja të komunikimin me klientët potencialë dhe ata ekzistues, le të sqarojmë disa prej avantazheve dhe disavantazheve kryesore të kësaj strategjie komunikimi:

Avantazhet e kësaj mënyre marketingu

• Aktualisht është një nga mënyrat më të lira për ti reklamuar një grupi të gjerë klientësh potencial pasi kosto e reklamës për adresë/marrës me email është mjaft e ulët, krahasuar me format e tjera të marketingut si p.sh. reklamat me fletushka, reklama me banner, etj.
• Ju lejon të ekspozoheni ndaj një game të gjerë klientësh potencialë (por që gama e këtyre klientëve është shumë e gjerë).
• Ndihmon që të nxjerrë emrin (brandin) tuaj përpara shumë njerëzve njëherësh,
• Etj.

Disavantazhet (në dëmin tuaj)

1. Shumica e adresave të cilat marrin mesazhe të tilla i konsiderojnë ato si SPAM, pasi nuk kanë rënë dakord t’i marrin ato. Thënë ndryshe, adresa e tyre është marrë pa lejen e tyre dhe tani shfrytëzohet për t’u shitur te bizneset që duan t’u dërgojnë mesazhe promocionale.
2. Mesazhet e dërguara në këto adresa zakonisht përfundojnë në SPAM. Pra edhe investimi juaj përfundon në SPAM! Vetëm një pjesë shumë e vogël realisht i merr dhe i konsideron me vlerë, por mjafton që adresa e dërguesit (në këtë rast adresa e biznesit tuaj) të listohet si adresë SPAM-i nga disa marrës, dhe automatikisht mesazhet e dërguara në adresat e tjera fillojnë të shkojnë gjithashtu në SPAM.
3. Nëse kompani serioze si Microsoft, Coca-Cola, etj., etj., do të fillonin të dërgonin mesazhe SPAM, atëherë klientët e tyre do të ndryshoni mendimin për seriozitetin e këtyre kompanive, pasi këto lloj mesazhesh do kishin një ndikim negativ në perceptimin e brand-it të këtyre kompanive. Thënë ndryshe, vlera e këtyre kompanive në sytë e publikut do të binte, që do të ndikonte më pas direkt në numrin e shitjeve!!

Marketingu me email është realisht një mënyrë shumë e mirë dhe efektive për çdo lloj biznesi, por nëse nuk bëhet siç duhet dhe mbi të gjitha duke respektuar vullnetin dhe dëshirën e klientëve tuaj potencialë për t’u informuar me email për brand-in apo produktet tuaja, atëherë do të kuptoni shumë shpejt se përpjekja juaj do të kthehet në kohë të humbur dhe acarim të klientëve me brandin tuaj.

Për më tepër, ndonëse ka mjaft biznese që e kanë nisur me marketingun me email me entuziazëm, dështimi apo rezultatet e dobëta i kanë bërë që të pothuajse plotësisht dorë.

Ja dhe një video ilustruese se si edhe brandet më të njohura përfundojnë në SPAM.

Çfarë opsionesh ekzistojnë?

Duke u nisur nga subjekti kryesor i këtij shkrimi nuk mund të zgjatem shumë këtu por minimalisht mund t’ju ofroj një listë sugjerimesh për të bërë marketing të pastër:

• Kërkojuni klientëve tuaj t’ju ofrojnë vullnetarisht adresat e tyre për mesazhe promocionale
• Krijoni një bazë adresash legjitime nga kontaktet që keni
• Vendosni një sqarim në hyrje të çdo mesazhi promocional për t’u çregjistruar nga lista juaj
• Respektoni në çdo moment kërkesat për t’u çregjistruar nga lista juaj
• Krijoni një formë mbledhje adresash në faqen tuaj
• Përdorni një program/softuerë që ju lejon të menaxhoni dërgimin e mesazheve
• Kërkoni konsulencë nga persona që e bëjnë këtë rregullisht, por që nuk abuzojnë me adresat
• Lexoni online shkrime dhe materiale që ju ndihmojnë të mësoni më shumë
• Etj., etj.

Sa herë keni marrë ndonjë mesazh me email për  një “ofertë fantastike” ku ju premtohej një laptop falas apo një dhuratë tjetër tërheqëse. Për ta përfituar duhej vetëm t’ia kalonit me email miqve tuaj apo ta shpërndanit në Facebook duke i dërguar një kopje të mesazheve një adrese tjetër “zyrtare për verifikim” ose duhet të regjistroheshit te një faqe “zyrtare, për verifikim”?

Ndërkohë ju ftoj t’i bëni vetes këto tre pyetje:

• sa herë keni dëgjuar për ndonjë person i cili apo e cila e kishte fituar “dhuratën”?
• sa herë keni fituar vetë?
• Sa herë oferta që keni marrë në fakt ka qenë një mashtrim?

Rast mashtrimi për vjedhje email-ash

Para pak ditësh ri-morra një ofertë për “laptop falas”. Këtë ofertë identike e kisha parë edhe disa muaj më herët, por në fakt kam parë variacione të sajat mbi 10 vjet më parë.

Oferta ishte si më poshtë:

Te nderuar,
Firma ERICSON, ne promovimin e vet ne treg ndan pa te holla Laptop.
Kjo Kompani dëshiron t’i popullarizoje prodhimet e veta.
Nëse ketë e-mail ua dërgoni 8 personave, fitoni dhurate një laptop ERICSON T18. Nëse ua dërgoni me shume se 20 personave, fitoni laptop ERICSON R320.
Kopjen e këtij e-maili ia dërgoni përfaqësuesit te kësaj Firme, Znj.Pranvera Polani [email protected]

me respekt:
Hamdi Sylejmani

Oferta e mësipërme dukshëm është një formë mashtrimi që përdoret nga “hajdutët e email-ave” të cilët përdorin një adresë false për të mbledhur sa më shumë adresa reale për t’u dërguar më pas mesazhe SPAM.

Zakonisht, janë sipërmarrje të tilla si ato që u ofrojnë bizneseve dërgimin e mesazheve promocionale te 100,000 apo 500,000 adresa te vlefshme, të cilat përfitojnë më shumë nga këto lloj teknikash “vjedhjeje”!

Nuk dua të zgjatem shumë për ta shpjeguar, por duke qenë se kam parë mjaft njerëz që kanë rënë pre e këtyre formave të mashtrimit online, do desha të evidentoj shumë shkurt disa nga aspektet që duhet minimalisht t’ju bëjnë dyshues kur merrni “oferta fantastike” me email.

1. Oferta nuk dërgohet nga vetë kompania (në këtë rast nga kompania ERICSON), por nga një miku/mikesha juaj, që tashmë ka rënë pre e mashtrimit duke u’a dërguar edhe juve.
2. Oferta përpiqet të bëhet më e besueshme duke dhënë emra produktesh, në këtë rast laptopë, që duket sikur janë të vërtetë. Por nëse do t’i investigonit, atëherë do të kuptoni që në rastin konkret ERICKSON T18 dhe ERICKSON R320 nuk janë as laptopë, por në fakt modele celulari. Që për më tepër kanë dalë në treg në vitin 2000!!!!!
3. Oferta kërkon që për ta përfituar, ju duhet t’ia kaloni atë edhe miqve tuaj (në këtë rast 8 ose 20 prej tyre). Por ajo që duhet t’ju bëjë të dyshoni është fakti se “për verifikim” duhet të përfshini edhe një adresë tjetër “zyrtare”. Në këtë rast, kërkohet që t’ia “dërgoni përfaqësuesit të kësaj Firme, Znj.Pranvera Polani [email protected]”!!! e cila nuk ka as adresë zyrtare kompanie si p.sh. [email protected] dhe nëse do ta kërkonit nga Google do t’ju dilte që as nuk punon atje e në mjaft raste as nuk ekziston si person!!!

Ka mjaft aspekte të tjera, disa pak më të fshehta, që do t’ju ndihmonin ta dallonit mashtrimin e këtyre lloj ofertash, por ideja është që nëse e keni pësuar një herë, atëherë përpiquni që mos të bëheni pre për herë të dytë.

Njëherazi, kur ju merrni pjesë në oferta të tilla mashtruese, si kjo e mësipërmja, fakti është që përveç jush, bëhen pre edhe miqtë dhe të njohurit tuaj, adresat e të cilëve u’a keni dorëzuar “hajdutëve” ju personalisht!

Si mund të mbroheni?

Ky do ishte një shkrim tjetër më vete, por shkurtimisht mund t’ju sugjeroj që:

• Mos e jepni adresën tuaj të email vend e pa vend
• Jepeni vetëm në faqe apo shërbime zyrtare të mirënjohura
• Nëse keni dyshime, atëherë krijoni një adresë kot, ku nuk do keni probleme nëse ju vijnë SPAM-e (si p.sh. [email protected])

Duke qenë se çdo kush prej nesh ka pasur eksperiencat e veta ndër vite, do i vlerësoja shumë komentet, sugjerimet dhe këshillat tuaja pasi besoj se janë me vlerë për gjithë ata persona të tjera që do jenë duke e lexuar këtë shkrim.

Ky prezantim i shkurtër do t’ju ndihmojë të kuptoni qartësisht disa nga avantazhet kryesore që Facebook ofron si platformë sociale nëpërmjet të cilët ju mund të promovoni/reklamoni me kosto të ulët biznesin apo nismën tuaj.

Gjithashtu, e kemi përdorur këtë prezantim për t’ju bërë edhe një ofertë që shpresojmë do jetë me interes për ju.

Mirëpresim çdo koment apo sugjerim që mund të keni.

Gjatë muajit prill 2013, mu dha mundësia të ndaja me një grup drejtuesish të një prej organizatave zhvillimore në vend, siç është World Vision. Trajnimi, i cili zgjati rreth tre orë, kishte për synim prezantimin e faqes së re në Facebook të organizatës, si dhe përçimin e mundësive që ky kanal i ri komunikimi përfaqëson për informimin dhe angazhimin e mëtejshëm të publikut të gjerë në punën dhe misionin e vetë organizatës.

Realiteti është se, pavarësisht faktit që World Vision është një organizatë e mirënjohur ndërkombëtare, shumica e publikut dhe mbështetësve të mundshëm brenda vendit, janë “injorant” për shumë nga nismat dhe projektet e përhershme përditshme të kësaj organizate me një ndikim të drejt-për-drejtë në jetën e fëmijëve dhe njerëzve ku organizatë punon.

Sfida ime, në këtë rast, si konsulent dhe ndërtues i faqes, ishte që t’i tregoja stafit të organizatës rreth përdorimit praktik të faqes sipas nevojave të organizatës, por më tej, t’i motivoja ata duke u treguar avantazhet e shumëanshme që ky kanal i ri komunikimi mund të sjellë në punën e tyre të përditshme me synim ndikimin dhe përfshirjen e vetë publikut të gjerë në përmbushje të vizionit dhe misionit të organizatës.

Personalisht, prej vitesh, mbetem mbështetës i punës së kësaj organizate kryesisht nisur dhe nga ndikimi që kam parë në jetët e fëmijëve me të cilët ata punojnë dhe që sigurisht kam pasur mundësinë t’i njoh edhe personalisht.

Nevoja e një platforme si Facebook për komunikimin zyrtar

Pa u zgjatur më tej, do doja të listoja disa arsye/argumente pse krijimi i një faqeje zyrtare në Facebook mund të jetë i domosdoshëm për organizatën apo biznesin tuaj. Këto janë arsye të njëjta me ato që lidhen me organizatën e mësipërme, por jam i bindur që vlejnë në shumicën e rasteve, sic mund të jetë edhe organizata apo biznesi juaj.

• Ekzistenca e faqeve të tjera të ngjashme, qoftë edhe jo zyrtare
• Përçimi i mesazhit/informacionit ndodh më mirë kur ka më shumë se një kanal komunikimi
• Publiku i gjerë përfaqëson një potencial të fshehur për nga mbështetja që mund të gjenerojë për vetë punën dhe misionin e organizatës/biznesit tuaj
• Procesi i informimit/edukimit duhet të jetë i vazhdueshëm për klientët ekzistues dhe ata të mundshëm.
• Kanalet e reja të komunikimit (si media sociale) janë praktikisht të detyrueshme në kohën që jetojmë, veçanërisht nëse duam të jemi aty ku janë edhe klientët tanë
• Etj.

Ndonëse, do mund të ndalesha gjatë për të shtjelluar secilin prej argumenteve të mësipërm, po i rikthehem vetëm pikës së fundit mbi domosdoshmërinë e përdorimit të kanaleve të reja të komunikimit si media sociale, të cilat nuk janë thjesht kanale informimi por të një komunikimi të vërtetë me publikun dhe vetë audiencën e synuar të organizatës/biznesit tuaj.

Nevoja e ofrimit të mënyrave dhe kanaleve të reja të komunikimit me publikun, siç mund të jetë faqja juaj në Facebook, kërkon në të njëjtën kohë kurajë dhe një angazhim serioz, dhe si e tillë duhet të bëhet edhe pjesë integrale e strategjisë së kompanisë tuaj për komunikimin me klientët/të interesuarit dhe publikun e gjerë gjithashtu.

Projekti më i fundit për të cilin pata nderin të jap sado pak ndihmë, ishte një nismë e “Democracy Village” (Fshati i Demokracisë) për organizimin e një trajnimi mbi “komunikimin politik”. Në rastin konkret, ndihmesa ime u kufizua vetëm në promovimin e trajnimit nëpërmjet Facebook-ut.

Ndërkohë, nisur nga fakti se “Democracy Village” ka shumë pak kohë që është prezantuar në botën fizike dhe atë virtuale, nevoja e vendosjes së një reklame për promovimin e shpejtë të trajnimit, ishte e domosdoshme.

Bëhej fjalë për një aktivitet që do të zhvillohej brenda 4 ditësh nga dalja e njoftimit, ndaj me një buxhet të kufizuar u krijua një reklamë dhe që nga dita e parë kur u krijua reklama numri i fansave nëpërmjet “likes” u shtua nga 32 në mbi 192.

Ndonëse, këto lloj shifrash mund të arriheshin relativisht kollaj duke e promovuar vetë trajnimin nëpër faqet e ndryshme apo profilet e miqve, nga ana tjetër koha e kufizuar dhe angazhimi që do kërkonte menaxhimi i kësaj pjese të marketingut, do t’i shtoheshin ngarkesës së madhe të organizatorëve dhe mundësisë së tyre për t’u marrë me aspekte të tjera organizative.

Për më tepër informacion, sigurisht që mund të drejtoheni gjithnjë pranë faqes në FB.

Një ndër projektet më interesante që ndërmora këtë fillim viti 2013 ishte një bashkëpunim me lëvizjen e mirënjohur MJAFT e cila mbajti një konferencë tre-ditore me organizata dhe partnerë të ndryshëm nga bota e aktivizmit civil nga rajoni dhe më gjerë.

Pjesa ime konsistonte në ndërtimin dhe menaxhimin e një faqeje për konferencën si dhe koordinimin e transmetimit drejt-për-drejtë ose “live stream” të sesioneve të kësaj konference.

Ishte padyshim një eksperiencë ndryshe pasi nënkuptonte një angazhim më aktiv se sa roli mbështetës vetëm me ndërtimin e faqes apo konsulencës për komunikimin.

Nisur nga ky projekt, desha të ndaj me ju disa nga aspektet kryesore të organizimit që mund të jenë ndihmesë në punën tuaj tani ose në të ardhmen. Shumica e këtyre aspekteve organizative do t’ju ndihmojnë të menaxhoni më mirë çdo projekt tjetër që për përfshin ndërtimin e një faqeje në internet.

Elementet bazë

1. Faqja në internet – domain + host + WordPress + template (ForwardTirana.org)
2. Materialet për faqen e internetit (fotot + shkrimet) – u siguruar nga organizatorët
3. Llogaria në Twitter – si kanal shtesë komunikimi të menjëhershme me audiencën
4. Llogaria në YouTube – për publikimin e regjistrimeve gjatë konferencës/arkiv online
5. Llogaria në Ustream.tv – për transmetimin e drejtë-për-drejtë të konferencës

Si u bë organizmi i punës?

Takimi  i parë konsistoi në ndarjen e ideve dhe konsiderimin e nevojave të organizatorëve.

Si fillim u panë disa shembuj ekzistues mbi të cilët mund të ndërtohej faqja e re dhe u ra dakord për detyrat përkatëse të të dyja palëve për sa i përket:

• Caktimi i strukturës dhe përmbajtjes së faqes
• Punës për ndërtimin e seksioneve të ndryshme të faqes
• Vendosjes së afateve për dorëzimin dhe verifikimin e materialeve
• Metodës së bashkëpunimit/komunikimit (Dropbox, email & celular).
• Implementimit të transmetimit drejt-për-drejtë “live stream”

Nga ana ime duhet të pranoj që në fillim se eksperienca e bollshme e organizatorëve me organizimin e konferencave si dhe puna me faqet në internet ishin faktorë që ndihmuan jashtë mase për të lehtësuar të gjithë procesin e organizimit dhe bashkëpunimin për këtë projekt.

Ndëtimi i faqesë së re bazuar mbi shembuj faqesh ekzistuese

Ndërtimi i një faqeje të re në internet është tashmë diçka relativisht e thjeshtë pasi procedurat janë lehtësuar mjaft, por nga ana tjetër, përputhja e nevojave të “klientit” me atë që i serviret nga uebmasteri, mbetet gjithnjë një sfidë me të cilën përballet çdo faqe e  re.

Një mënyrë praktike që unë përdor zakonisht me ata të cilëve zgjedh t’u ndërtoj një faqe, është gjetja dhe përdorimi i shembujve ekzistues. Thënë ndryshe, zakonisht gjejmë faqe shembull mbi të cilat mund të modelojmë faqen e re. Ajo që u shpjegoj klientëve është fakti se tani nuk kemi më nevojë “të shpikim rrotën nga e para”. Në botën e internetit ekzistojnë më qindra mijëra faqe të tjera të ngjashme me atë që kërkohet të ndërtohet, ndaj është shumë më e thjeshtë nëse merren paraprakisht shembujt e faqeve të tjera dhe më pas diskutohet mbi elementët e ndryshëm që ato ofrojnë dhe se si ato mund të implementohen/përdoren për ndërtimin e faqes së re.

Caktimi i strukturës dhe përmbajtjes së faqes

Përgatitja e informacioni është shpesh një nga aspektet më të vështira në ndërtimin e një faqeje të re pasi kërkon mjaft kohë dhe eksperiencë paraprake për sa i përket përcaktimit të strukturës dhe gjenerimit të përmbajtjes me shkrime dhe foto.

Në këtë rast eksperienca paraprake e organizatorëve ishte thelbësore pasi këto detaje të punës u caktuan që në takimin e parë dhe gjithçka procedoi normalisht.

Gjithsesi, është me vlerë të theksojmë se përcaktimi paraprak i strukturës (kategoritë, logoja dhe ndarjet e tjera) të faqes si dhe më pas vetë përmbajtja (shkrimet, fotot, etj.) që do të përdoret për faqen janë aspekte thelbësore për vetë suksesin e faqes.

Gjithashtu, duhet theksuar se struktura dhe përmbajtja e faqes duhet të jenë në funksion të nevojave të organizatorëve dhe audiencës së faqes, dhe jo e kundërta.

Vendosja e afateve për dorëzimin e punës

Në këtë rast afatet për dorëzimin e faqes ishin të përcaktuara pasi gjithçka duhet të ishte gati të paktën një javë përpara konferencës, por si rregull, vendosja e afateve ndihmon në realizimin në kohë të çdo lloj projekti, ndryshe gjithçka mund të shtyhet pafundësisht dhe shpesh herë projekte të tilla mbarojnë muaj me vonesë (në disa raste edhe më gjatë se një vit).

Metoda e bashkëpunimit

Nevoja për implementimin në kohë të projektit nënkupton gjetjen e zgjidhjeve të cilat lejojnë bashkëpunimin e vazhdueshëm në distancë.

Sot, me mjetet e shumta të komunikimit në distancë, bashkëpunimi është vetëm një procedurë që nënkupton zgjedhjen e mjeteve të duhura dhe të përshtatshme me nevojat e të dyja palëve.

Në këtë rast u përdorën

• Dropdox.com
• Email-i
• Celulari

Mund të duket si e parëndësishme përmendja e mjeteve të tilla si Email-i apo celulari, por në fakt ka shumë raste kur bashkëpunimi kufizohet vetëm në komunikimin me celular apo vetëm Email, të cilët detyrimisht kufizojnë edhe mundësitë e realizimit në kohë të çdo projekti.

Ndërsa për Dropbox-in duhet të sqaroj se është një softuer i cili lejon krijimin e dosjeve virtuale të përbashkëta (shared folders) të cilët ndihmojnë jashtë mase me organizimin dhe përgatitjen e materialeve të ndryshme për faqen. Këto materiale mund të vendosen të gjitha brenda një dosjeje të përbashkët dhe ky organizim lejon ndjekjen më të mirë të punës nga të dyja palët.

Implementimi i transmetimit drejtë-për-drejtë me “live stream”

Zhvillimet e shumta të teknologjisë tashmë mundësojnë edhe transmetimet e drejtë-për-drejta nëpërmjet internetit që lejojnë kapjen e një audience edhe më të gjerë e cila nuk mund të jetë e pranishme fizikisht.

Në këtë rast u përdor shërbimi i faqes UStream.tv e cila është një aktualisht ndër shërbimet më të mira (për sa i përket versioneve falas ose pak të kushtueshme). Sigurisht, ekzistojnë edhe shumë shërbimet të tjera të ngjashme, por që ndryshojnë për nga aspektet teknike dhe financiare me të cilat e ofrojnë shërbimin e tyre.

Personalisht, jam shumë i dhënë ndaj teknologjisë dhe mbetem entuziast për gjithçka që të lejon të bësh! Por, në të njëjtën kohë, më duhet të pranoj pengesat apo mënyrat se si teknologjia më kufizon që të bëj atë që duhet të bëj më mirë – konkretisht; të organizoj mendimet apo të planifikoj punën time! Prandaj, e them me bindje të plotë se, deri tani, nuk kam gjetur asnjë teknologji më të mirë se sa një stilolaps me një bllok shënimesh që të më ndihmojnë gjatë procesit të planifikimit apo organizimit të punës së përditëshme.

Gjithashtu, kam kuptuar që kjo dukuri është shumë e përhapur! Mund të them me garanci se e kam dëshmuar shumë herë këtë fakt te mjaft menaxherë, CEO apo njerëz të tjerë të cilët çdokush do t’i konsideronte të suksesshëm në atë që bëjnë. Pavarësisht përmirësimit të vazhdueshëm të teknologjive për biznesin, ata vazhdojnë të përdorin stilolapsin dhe letrën/bllokun për të mbajtur shënime si dhe për të organizuar mendimet apo punën e tyre të përditshme. Më pas këto shënime mund të kalohen në celular apo në kompjuter, por për ta, procesi kreativ apo organizativ mendor kryhet më mirë me një stilolaps dhe letër!

Avantazhi kryesor i përdorimit të stilolapsit dhe letrës është pikërisht mundësia për t’u fokusuar apo për t’u përqëndruar plotësisht në atë që duhet të bëni pa u shkëputur vëmendja nga teknologjitë e tjera (si p.sh. kompjuteri, celulari, etj) apo edhe vetë njerëzit që keni përreth. Ndonëse shumëkush është joshur nga ideja dhe i mban bindjen se mund të bëjë shumë gjëra njëherësh (ajo që ndryshe quhet ‘multitasking’), fakti mbetet, dhe studimet e kanë provuar, që ne i bëjmë gjërat më mirë kur i bëjmë një-nga-një. Sidomos, për sa i përket diskutimit në fjalë – procesit kreativ, planifikimit të punës apo organizimit të ideve. Ky proces kryhet më mirë kur ne i japim përqëndrim dhe vëmendje të plotë. Kjo është e vetmja arsye pse mbetem mbështetës i fortë i përdorimit të kësaj teknologjie ‘të lashtë’ siç është stilolapsi dhe letra!

Në çdo rast duhet të pranojmë se teknologjia më e mirë është ajo që na lejon të bëjmë më mirë punën tonë por njëherazi duhet të jemi të kujdesshëm kur ajo mund të na kufizojë të bëjmë gjëra bazë siç është procesi i të menduarit! Për disa prej nesh, stilolapsi dhe letra janë brenda kompjuterit apo tablet-it që mbajnë gjithë kohës me vete, ndërsa për të tjerë mbetet blloku i shënimeve apo copa letrash që i mbajmë gjithnjë me vete. Në fund të ditës, jeni ju vetë që duhet të analizoni dhe kuptoni se cila është teknologjia apo mjetet që ju lejojnë të bëni më mirë atë që quhet planifikimi apo organizimi i punës tuaj.

Siç e kam shpjeguar edhe në një shkrim të mëparshëm, nëse nuk jeni ende në rrjetin profesional të LinkedIn, atëherë gjasat janë që jeni duke humbur mjaft në kuadër të zhvillimit tuaj profesional (personal apo edhe si kompani).

Për t’u ardhur në ndihmë nevojave të ndryshme të miliona profesionistëve të këtij rrjeti, LinkedIn solli së fundmi edhe mundësinë për të ndjekur zhvillimet në profilet e disa prej profesionistëve me ndikim në fushat e ndryshme të biznesit (në të njëjtën mënyrë siç mund të bëhet me kompanitë e listuara në këtë rrjet).

Ndër vlerat kryesore për ju si profesionistët është fakti që kjo e bën më të lehtë të ndjekësh personazhet/profesionistët e ndryshëm që janë me interes për punën dhe profesionin tuaj (sipas një liste të përzgjedhur nga stafi i LinkedIn).

Duke ndjekur shkrimet, postimet, komentet dhe zhvillimet e ndryshme brenda profilit të këtyre profesionistëve të ndryshëm ju do jeni në gjendje të qëndroni më të informuar por edhe të mësoni më shumë nga ata që aktualisht janë shembuj profesionalë dhe udhëheqës të mendimit profesional dhe më gjerë.

Ndonëse aktualisht kjo listë është shumë e kufizuar, LinkedIn premton që ky funksion do të zgjerohet për t’iu bashkëlidhur çdo profili/profesionisti tjetër me interes për ju.

Si mund t’i ndiqni këta profesionistë?

LinkedIn sugjeron një listë paraprake me profesionistë të cilët ju mund t’i ndiqni duke klikuar profilin e tyre. Pasi të jeni loguar, mjafton të klikoni butonin Follow dhe gjithçka do funksionojë automatikisht më pas.

https://www.linkedin.com/today/post/whoToFollow

Aktualisht, ndër profesionistët/drejtuesit që fillova të ndjek janë:

• Richard Brandson

Është shumë e vërtetë që teknologjia e ka lehtësuar jashtë mase komunikimin e njerëzve me njëri-tjetrin, por në të njëjtën kohë kjo teknologji (interneti) ka sjellë edhe një dimension për të cilin shpesh nuk jemi aq të vetëdijshëm. Tashmë teknologjia është bërë “palë e tretë” në çdo komunikim që ne kemi me miqtë apo palët në biznes, por sa të kthjellët jemi për mënyrat se si ajo ndikon në transformimin e standardeve tona gjuhësore dhe vetë komunikimit?

Sfida e komunikimit në biznes, ndonëse mjaft e thjeshtuar nga teknologjia, është njëherazi e mveshur me “një protokoll të ri” – atë të standardeve të komunikimit në internet sipas gjuhës së makinave!

Si dikush që përpiqet vazhdimisht të vërë në funksion maksimal mundësitë komunikuese të internetit, shkrimi i Ardian Vehbiut vjen si një shtysë e fortë për të reflektuar mbi aftësitë përkthyese por edhe shndërruese të internetit si “palë e tretë” në komunikimin tonë.

Në faqen e tij ai shprehet kështu: “Sot në këtë komunikim mes nesh janë futur, si palë të treta, edhe makinat – që ti të gjesh ç’kam shkruar unë për pulën e Hindit, duhet që të çojë atje një motor kërkimi; dhe motori i kërkimit s’mund ta bëjë këtë, pa e pasur lexuar më parë tekstin tim.

Edhe pse softuerin e kanë shkruar njerëz prej mishi dhe gjaku, mënyra si operon kodi, sidomos në trajtimin e teksteve, nuk i ngjan sonës.

Duam s’duam, Interneti i ka bërë makinat (dhe softuerin) palë të treta në komunikim; dhe kur flasim për standarde, të të gjitha llojeve përfshi edhe gjuhën, nuk duhet të kemi parasysh vetëm dialektet e njerëzve, por edhe ato të makinave.”

Për më tepër ju ftoj ta lexoni të plotë shkrimin e tij: CENSUSI I FJALËS.

Nëse mendoni se shumë shpejt do të flakeni jashtë vendit tuaj të punës, bëni mirë të lexoni shenjat e fshehta që do t’ju paralajmërojnë për këtë

Ekzistojnë dy lloj punonjësish. Ata që e kanë idenë se çfarë bëjnë, kush janë dhe se çfarë pozicioni luajnë në kompani. Këta kanë qëllime që përpiqen t’i arrijnë, janë të mençur dhe shumë shpejt do të marrin një ngritje në detyrë. Lloji tjetër i punonjësve janë ata që edhe njeriu më paqësor në botë do t’i urrente, janë të palumtur, dembelë, nuk kanë asnjë qëllim për punën, nuk pranojnë sfida të reja dhe e shpenzojnë të gjithë ditën në internet, telefon ose kafene. Ja shenjat që ju tregojnë se jeni në rrugën e të pushuarit nga puna. Nëse u përgjigjeni pozitivisht tri prej këtyre pyetjeve, atëherë filloni të kërkoni për një vend tjetër pune.

1. Jeni jashtë të rejave të kompanisë? Kjo është një shenjë e madhe. Nëse më parë kishit informacione për atë që ndodhte në vendin tuaj të punës, por tani nuk keni më asnjë të dhënë dhe papritur e gjeni veten jashtë çdo lajmi të ri në kompani, atëherë me keqardhje duhet të dini se emri juaj po fillon të vijëzohet me të kuqe.
2. E ndieni veten të shmangur nga të tjerët? Kontakti me sy është një nga format më të mira të komunikimit, kur gjërat po shkojnë mirë, por nëse ky kontakt ndërpritet, asgjë e mirë nuk do të ndodhë. Të shikosh në sy dikë që e di shumë mirë se është në telashe të mëdha, është diçka shumë e vështirë, ndaj nëse jeni ju ai apo ajo që nuk ju shohin më në sy, që nuk ndalojnë të bëjnë një bisedë të shkurtër, apo nëse një dhomë boshatiset sapo hyni ju, dijeni se jeni në probleme të mëdha.
3. E lexojnë ecurinë tuaj në punë si një lajm në kronikën e zezë?

Shumicën e herëve ecuria në punë është një përmbledhje e arritjeve tuaja të mira, edhe pse shefi juaj nuk dëshiron të thotë “shumë të mira”, sepse gjithnjë ka vend për përmirësim. Nëse kohët e fundit përmbledhja juaj ka filluar të mbushet me shprehje negative dhe ajo lexohet pa entuziazëm dhe me një ton dramatik, atëherë bëni mirë që të filloni të luteni.

1. Është shitur apo shkrirë kompania në të cilën punoni? Rrallë mund të ketë një lajm të mirë në këto raste për punonjësit. Normalisht që drejtuesit e kanë rregulluar një marrëveshje të mirë për veten e tyre, por stafi kur kompania është shitur apo shkrirë, pritet të ndryshojë në një përqindje të lartë. Kur dy kompani shkrihen në një, kjo do të thotë se të gjitha vendet e punës përsëriten dy herë, atëherë në këtë rast zbatohet e tmerrshmja: “shkurtime”.
2. Ju kanë ngarkuar punë të rëndësishme pa asnjë mundësi të realizohen? Ky është fundi juaj i fshehtë dhe mos kujtoni se jeni të vetmit, është një metodë shumë e përhapur. Në këtë rast kompania ka nevojë për një arsye të fortë që t’ju largojë. Kështu ju ngarkon një detyrë të madhe, të cilën ju ka gjasa të mos e përmbushni kurrë, sepse në vetvete ajo punë është projektuar për të qenë e pamundur. Kjo metodë përdoret për personat që kanë pasur vetëm arritje të mira, që i kanë përkushtuar punës jetën dhe familjen e tyre.
3. 6.  A keni më pak përgjegjësi sesa një praktikant? Për fatin tuaj të keq zhveshja nga përgjegjësitë është një shenjë e sigurt se pushimi juaj nga puna do të shfaqet shumë shpejt në horizont. Në fund të fundit askush nuk nxjerr jashtë nga kompania dikë që ka tonelata pune për të përfunduar. Pritet që drejtuesit t’ju japin një titull të ri, me shumë pak punë dhe pothuajse asnjë anëtar grupi. Kështu ju do ta gjeni veten duke ndenjur kot gjithë ditën, një shenjë e mirë kjo se shumë shpejt do të vijë shefi dhe t’ju nxjerrë në rrugë.
4. E ndërpresin bisedën kolegët tuaj sapo ju afroheni? Nëse jeni duke marrë fund, kini parasysh se do të jeni i fundit që do ta merrni vesh. Teksa thashethemet për fundin tuaj përhapen me shpejtësi në çdo zyrë, dijeni se kolegët tuaj do të jenë shumë të lumtur të diskutojnë rreth saj. Do të shihni njerëz që pëshpëritin nëpër cepa dhe nëse ju afroheni, biseda do të ndërpritet për të vazhduar me komentimin e motit. Dijeni se nuk e keni të gjatë…
5. Keni parë të shpallur një vend të lirë pune që i përngjan pozitës suaj? Burimet njerëzore mund të jenë shumë dinakë. Ata nuk duan t’ju pushojnë pa pasur dikë që t’ju zëvendësojë menjëherë. Për këtë arsye ka shumë mundësi që vendi juaj i punës të reklamohet për muaj në internet ose tek agjencitë e punësimit. Edhe në rastin më të keq, ata e punësojnë personin tjetër më shpejt sesa ju të ikni dhe ju ngarkojnë si detyrë që ta mësoni atë. Pastaj, ju pushojnë!
6. Ju kanë kërkuar të shkoni me pushime? Le të jemi të sinqertë tani, kompanitë në çdo vend të botës nuk janë agjenci turistike. Nëse ato ju japin juve një ofertë për të shkuar me pushime ka dy mundësi: “Keni vite që e prisni ose do t’ju pushojnë së shpejti”. Duke ju larguar për ca kohë, ata do ta kenë më të lehtë për të diskutuar për pushimin tuaj nga puna pa ju pasur vërdallë. Në kohën kur ta kenë marrë vendimin, bashkë me valixhet e pushimeve, merrni edhe sendet tuaja të punës dhe kthehuni në shtëpi.
7. Jua kanë anashkaluar sukseset e arritura së fundmi? Në këtë rast shefat dhe bashkëpunëtorët tuaj fillojnë të mos i vënë re sukseset tuaja të fundit, ju ulin vlerat dhe ngrenë rolin e tyre. Nëse të gjithë po fillojnë ngadalë të mos ju respektojnë apo vlerësojnë punën, të njëjtën sasi pune që për të cilën më parë ishit cilësuar “njeriu i artë” i kompanisë, këto janë shenja të një pushimi afatgjatë nga puna.
8. A është larguar shefi apo mentori juaj? Nëse dikush të cilit ju i besonit dhe e respektonit shumë, është larguar nga puna për arsye të ndryshme, si rritje në detyrë, i pushuar apo ka hequr dorë, kjo nënkupton telashe për ju. Ky person mund të ishte i vetmi që mund t’ju mbronte nga ujqërit e zyrës, tashmë jeni vetëm dhe jo për një kohë të gjatë në atë pozicion.