Unë nuk jam një person i mirëfilltë publik, ndonëse në mjaft raste kam pasur mundësinë të dal në medie apo programe të ndryshme. Por nevoja e krijimit të një profili publik në dallim nga një profil personal në Facebook ishte kryesisht nevoja për t’i përbashkuar interesat dhe përfshirjet e ndryshe të miat në një faqe e cila do më lejonte t’i mbaja të ndara gjërat personale (siç janë fotot familjare në profilin tim) me fotot nga aktivitete apo nisma të ndryshme në të cilat jam pjesë.

Gjithsesi, kjo lidhet shumë me krijimin dhe mbajtjen e një profili profesional brenda medieve sociale si Facebook.

Linku direkt: https://www.facebook.com/plaku.al/

Sfida në vazhdim

Në morinë e faqeve dhe profileve që duhet të menaxhoj/monitorojë çdo ditë tani kam edhe një detyrë tjetër “të vockël” që sigurisht kërkon kohën, energjinë dhe përqendrimin e vet. Por duke pasur parasysh që projekte si ky nuk bëhen vetëm për momentin, mbetem i bindur se do t’ia vlejë investimi.

Avantazhet në krijimin e një faqeje zyrtare në Facebook për veten si individ

Kjo do ishte një listë e shkurtër:

• Ndarja e profilit personal nga ai publik dhe gjithëpërfshirës
• Tërheqja e një game më të gjerë ‘ndjekësish’ apo fansash
• Prezantim projektesh, produktesh dhe shërbimesh (pra marketing)
• Reklamim i shërbimeve të ndryshme që ofroj si konsulent
• Mbështetje dhe prezantim i kauzave që dua të mbështes publikisht,

Diskutim

Çfarë mendoni, kam bërë mirë apo jo ? Do i vlerësoja shumë sugjerimet/komentet tuaja…

Shumica e postimeve që bëhen në Facebook janë thjesht informative apo zbavitëse dhe nuk kanë për synim tjetër veç se të marrin ndonjë “Like” apo koment të radhës.

Por situata ndryshon kur bëhet fjalë për bizneset dhe organizatat të duhet ta përdorin Facebook-un për të promovuar produktet apo shërbimet e tyre te klientët. Avantazhet e medias sociale për marketing online janë të shumta për çdo lloj biznesi, por në rastin tonë dua të trajtoj vetëm një element që lidhet me përdorimin e duhur të postimeve në Facebook.

Një shembull konkret

Rishtazi po komunikoja me një prej klientëve të mi në lidhje me postimin e tyre të radhës në Facebook. Situata ishte e thjeshtë, postimi thoshte “regjistrohuni tani” dhe kishte një foto të madhe dhe të qartë, por “ku”, “si” apo “çfarë” duhet të bënin ata që donin të regjistroheshin, nuk ishte e sqaruar siç duhet. Tani dikush mund të thotë që vizitorët e faqes tonë e dinë se për çfarë bëhet fjalë dhe kush jemi kështu që rrjedhimisht e dinë edhe ku ta gjejnë informacionin shtesë apo në rastin aktual – ku të regjistrohen.

Por unë do sugjeroja që çdo postim apo koment që ju bëni në Facebook duhet të jetë i qëllimshëm dhe i mirë menduar me qëllim që t’ua bëni sa më të lehtë dhe të thjeshtë vendimmarrjen lexuesve apo klientëve tuaj potencialë.(shih foto 01. djathas)

Rrjedhimisht, i sugjerova klientit tim menjëherë që të ndërhynin te postimi që kishin bërë duke shtuar edhe “një link” brenda përshkrimit, që t’i dërgonin personat e interesuar te faqja zyrtare regjistrimit.

Ndryshimi është i thjeshtë por mjaft i rëndësishëm. (shih foto 02. majtas)

Një arsye tjetër bazuar te statistikat

Në rastin e klientit që përmenda, arsyeja ishte edhe më thelbësore. Nga mbi 20 e ca postime që ata kishin kryer gjatë një periudhe 1 mujore në Facebook, rezultati ishte që ata kishin marrë vetë 43 klikime direkt nga Facebook, nga 1,473 vizitorë totalë të faqes zyrtare për të njëjtën periudhë! (shih. 03. djathtas). Dhe bëhet fjalë për një faqe në Facebook e cila ka rreth 12,000 fansa.

Pra, nëse investoni kohë dhe energji për të përditësuar faqen tuaj në Facebook, sigurohuni që kur jeni duke reklamuar produktin apo shërbimin tuaj, t’i jeni edhe “një link” me më shumë informacion apo arsye që ata të marrin një vendim!

Si mendoni? Çfarë sugjerimesh të tjera keni? Do e vlerësoja kontributin tuaj mbi këtë temë nëpërmjet komenteve këtu poshtë.

Kontrolli vs kufizimet

Që në fillim mund ta përmbledhim këtë shkrim duke përcaktuar dy faktorët që bëjnë diferencën kryesore ndërmjet hostimit ‘falas’ dhe atij ‘me pagesë’.

Faktorët kryesorë janë “kontrolli” kundrejt “kufizimeve” !

Nëse doni të keni kontroll të plotë mbi aspektet e ndryshme të menaxhimit të faqes, për të përfituar në maksimum nga potenciali i saj, atëherë avantazhet e hostimit me pagesë janë të pakrahasueshme kundrejt kufizimeve të atij falas!

Po cilët janë disa prej aspekteve që ju mund ti kontrolloni te një host me pagesë kundrejt kufizimeve me të cilat duhet të përballeni kur e ndërtoni faqen tuaj në host falas?!

Mundësia e konfigurimit sipas nevojave tuaja

Ky aspekt mund të duket i vogël kundrejt një konfigurimi të gatshëm ose minimal që ofrohet nga hostet e ndryshme falas. Por eksperienca dhe koha do t’ju tregojë se ky aspekt është i domosdoshëm pasi realisht do e kuptoni se sa të kufizuar jeni kur përdorni një zgjidhje (në dukje – të thjeshtë) por që realisht ju kufizon ju dhe potencialin në rritje të faqes tuaj.

Aksesi dhe numri i databazave

Nëse doni që faqja juaj të jetë vërtetë dinamike dhe të shfrytëzoni potencialin e plotë të sistemeve për menaxhimin e përmbajtjes (Content Management System – CMS), atëherë përdorimi i databazës është i pashmangshëm. Por problemi që mund të keni është pikërisht aksesi te databaza apo mungesa e një databaze. Problemi bëhet edhe më i vështirë kur ju duhet të ndërtoni apo të ngrini një faqe të dyte apo një sistem tjetër që kërkon databazën e vetë.

Numri i adresave te email

Ka mjaft njerëz që kur ndërtojnë faqen e vet sigurisht mundohen të krijojnë edhe një apo disa adresa email zytare që shkojnë me adresën e faqes. Këtë çështje e kemi diskutuar edhe në një shkrim të mëhershëm, por ideja është që hostet falas nuk e ofrojnë mundësinë e krijimit të një apo më shumë adresave falas. Ndërkohë, kjo është lehtësisht e realizueshme në një host me pagesë.

Siguria nëpër hostet (serverat) falas

Problemi i sigurisë nuk është i njëjtë për çdo lloj hosti falas por nëse faqja juaj është hostuara në një host të madh me shumë faqe të tjera dhe që nuk mirëmbahet rregullisht, për shkak se nuk ka fitim për ofruesin, atëherë edhe rreziqet janë të larta pasi faqja juaj mund të sulmohet edhe nga brenda hostit ose edhe nga jashtë për shkak se softueri i vetë hostit nuk është i përditësuar apo edhe ai i faqes tuaj. Përmirësimin e sigurisë së faqe e kemi diskutuar edhe më parë.

Mungesa e suportit (vetëm me pagesë)

Çfarë do ndodhte nëse ju del një problem apo keni nevojë për ndihmë teknike me diçka në lidhje me faqen tuaj? Hostimet falas nuk ofrojnë suport pa pagesë! Ndërkohë që hostimet me pagesë zakonisht e kanë këtë shërbim të përfshirë në çmimin që ju paguani për vetë hostimin e faqes tuaj.

Mundësia e instalimit te softuerit te dëshiruar

Nëse jeni në një host falas, atëherë thjesht harrojeni sepse shërbimi i hostit nuk është i interesuar në nevojat tuaja por thjesht shërbimin që ofron dhe reklamat që vendos në faqen tuaj. Ndërkohë që nëse ju jeni duke u zhvilluar dhe zgjeruar, atëherë edhe nevojat tuaja për të instaluar sistemin apo softuerin e dëshiruar janë pjesë e strategjisë dhe nevojave tuaja në rritje, por që nuk ua ofron dot hosti falas.

Mundesia e intalimit te plugin-eve te dëshiruara

Edhe në këtë rast, instalimi i funksionaliteteve (plugin-eve) të dëshiruara është mjaft i kufizuar në shumicën e hosteve falas, rrjedhimisht edhe mundësia juaj për të shfrytëzuar potencialin maksimal të faqes tuaj.

Në përfundim

Kosto e kufizimeve që gjenden në platformat falas është e konsiderueshme. Eksperienca dhe koha do t’ju tregojë se nëse jeni serioz për faqen tuaj, atëherë ashtu duhet të jetë edhe investimi juaj financiar dhe kohor.

Rishtazi po kontrolloja ecurinë e një fushate me reklama në Facebook për një klient dhe pashë që Facebook kishte nxjerrë një mesazh falenderimi me rastin e arritjes së mbi dy milion reklamuesve aktiv.

Aktualisht, Facebook ende nuk krahasohet dot me milionat e reklamuesve aktivë në platformat e Google (siç është Google Adwords, AdSense, DFP, etj.). Por, në këtë rast, Facebook ka treguar që reklamat në platformën e vet janë më konkurruese se ato në platformat e tjera, qoftë nga çmimi, qoftë nga aspekte të tjera si shënjestrimi (targetimi) sipas moshës, interesit, gjuhës, kombësisë, interesave, etj,. etj,.

Gjithashtu, duhet thënë se suksesi i Facebook është i kufizuar vetëm brenda platformës pasi në internetin e gjerë Google është kampion i padiskutueshëm dhe suksesi i vet do të mbetet i tillë për aq kohë sa njerëzit do vazhdojnë të përdorin, thuajse ekskluzivisht, motorin e vet të kërkimit për të gjetur ato çfarë kërkojnë në internet.

Aktualisht, tarifat e reklamimit në Google janë më të larta (CPM ose CPC, etj) krahasuar me ato brenda Facebook apo LinkedIn, por reklamimi online bëhet me kosto shumë më konkurruese se sa në mediat tradicionale siç janë televizioni, gazeta, revista, apo posterat dhe banerat e printuar, etj.

LinkedIn e ka përmirësuar gjithashtu mjaft sistemin e brendshëm të reklamimit dhe është një platformë mjaft e vyer për çdo profesionist apo biznes që synon të shënjestrojë klientët biznese dhe profesionistët në përgjithësi.

Reklamat në Google

Reklamimi në Google është optimal nëse audienca e synuar është e përgjithshme dhe ju dëshironi ta shfaqni reklamën tuaj te një gamë sa më e gjerë shikuesish në internet. Normalisht, në këtë rast ka edhe shumë firo pasi reklama juaj duhet t’i shfaqet një numri sa më të madh shikuesish dhe numri i atyre që do ta klikojnë është shumë i vogël, prandaj edhe duhet të siguroheni që ta shënjestroni sa më mirë sipas kritereve demografike të klientëve potencialë që dëshironi të arrini.

Por nëse arrini ta ri-shënjestroni (re-target) audiencën e faqes tuaj nëpërmjet (re-marketing), por kjo është disi më e vështirë për t’u arrirë nëse e keni për herë të parë.

Reklamat në Facebook

Facebook është shumë më i përparuar për sa i përket mundësive të shënjestrimit të reklamës tuaj te klientët potencialë që dëshironi, por në vartësi të biznesit apo fokusit tuaj, ka gjasa që edhe të gjithë klientët potencialë nuk janë në Facebook. Gjithsesi, Facebook ka një raport kthimi mbi investimin relativisht më të lartë se sa Google pasi është më e lirë për të reklamuar dhe më e sofistikuar në mënyrat e shënjestrimit.

Ka edhe mjaft teknika të tjera për ta nxjerrë reklamën tuaj te fansat e konkurrentit tuaj, apo reklamimi te klientët ekzistues kur bëhet fjalë për një fushatë me produkte/shërbime ekzistuese, etj.

Reklamat në LinkedIn

Nëse klientët tuaj potencialë janë profesionistë apo biznese/organizata, atëherë LinkedIn është platforma kryesore ku duhet të mendoni të reklamoni. Platforma e reklamimit në LinkedIn është zhvilluar më vonë se ajo në Facebook, por LinkedIn është shumë më përzgjedhës dhe i kujdesshëm në mënyrën se si i shfaq reklamat e veta te abonentët e platformës pasi edhe bëhet fjalë për profesionistë me interesa specifike dhe nuk kanë shumë kohë as tolerancë për foto kafshës shtëpiake siç ndodh rëndom në Facebook!

Reklamat në platforma të tjera reklamimi

Platforma të tjera mjaft interesante janë edhe Bing, Yahoo, Twitter, Tumblr, Pintrest, por nisur edhe nga përdorimi më i kufizuar nga shqiptarët, nuk po zgjerohem më tej në këtë shkrim.

Mirëpres pyetjet, sugjerimet dhe komentet e tjera që mund të keni. Gjithashtu, mos nguroni të më kontaktoni direkt nëse jeni të interesuar në ndonjë prej shërbimeve të lartpërmendura. Flm, Elvisi

Ky sondazh është pjesë e një diskutimi më të gjerë që duam të bëjmë me ju lexuesit tanë. Ju lutem jepni votën tuaj si dhe komentet shtesë te pjesa më poshtë:

Ky është versioni prezantim i shkrimit me të njëjtin emër që mund ta gjeni të plotë këtu: Përfitimet e një ditari profesional!

A do t’i besonit një ‘mesazhi zyrtar’ me email nga një biznes apo organizatë e mirënjohur nëse mesazhi do t’ju vinte nga një domain si p.sh. [email protected] apo [email protected] ose [email protected] ?

E pra, kjo është situata në të cilën gjenden mjaft biznese shqiptare të cilat dukshëm nuk e marrin seriozisht prezantimin që bëjnë te klientët potencialë apo bashkëpunëtorët e ardhshëm sa herë që u dërgojnë një mesazh nga një adresë e përgjithshme (gmail.com / yahoo.com / Hotmail.com / etj.) dhe aspak profesionale!

Në dukje çështja e adresës tuaj të email-it mund të anashkalohet si një gjë mjaft e vogël, ose aspak e rëndësishme, por ka disa arsye dhe argumente pse duhet të filloni ta mendoni ndryshe këtë gjë.

Si fillim, le të nxjerrim listën me justifikime pse mjaft persona nuk e konsiderojnë nevojën për të pasur një adresë profesionale!

• Kam vite që e kam këtë adresë
• E kanë të gjithë kontaktet që kam
• Nuk di të hap një adresë tjetër
• Hapja e një adrese tjetër është humbje kohe
• Njerëzit më njohin dhe e dinë që kjo është adresa ime

Biznesi apo organizata juaj ka gjithnjë nevojë që të përfaqësohet në një mënyrë sa më profesionale dhe rrjedhimisht të besueshme. Profesionalizmi është baza mbi të cilën klientët dhe bashkëpunëtorët tuaj mund të ndërtojnë një marrëdhënie afat-gjatë me ju, ndaj çdo detaj është i rëndësishëm për të përçuar një imazh sa më profesional. Adresa juaj e email është thjesht një detaj, por në botën e sotme dixhitale adresa juaj e email është shpesh dera kryesore e komunikimit efektiv dhe profesional.

Atëherë le t’i përgjigjemi ‘justifikimeve’ të mësipërme:

Kam vite që e kam këtë adresë

Adresa personale nuk duhet dhe nuk mund tw jetw adresa juaj profesionale. Ndaj nuk keni nevojë që të ngeleni peng i një adrese kur në çdo rast keni mundësi t’i bëni ‘forward’ të gjithë mesazheve që ju vijnë te adresa juaj e re si dhe t’i njoftoni kontaktet tuaja që t’ju kontaktojnë në të ardhmen te adresa juaj profesionale.

E kanë të gjithë kontaktet që kam

Nuk është e thënë që ju ta fshini fare adresën tuaj origjinale, mjafton t’i njoftoni kontaktet dhe t’i tërhiqni mesazhet që ju vijnë direkt te adresa juaj profesionale. Ka mjaft mënyra për ta bërë këtë dhe nuk kërkon ndonjë aftësi të lartë teknike.

Nuk di të hap një adresë tjetër

Nëse përdorni shërbimin tonë (email hosting me 10 euro/vit), atëherë hapja e një adrese të re profesionale është mjaft e lehtë pasi mjafton të zgjidhni domain-in që dëshironi dhe më pas mund të krijoni adresën tuaj dhe ato të biznesit tuaj me një domain unik dhe sigurisht profesional.

Hapja e një adrese tjetër është humbje kohe

Është e vërtetë që në fillim mund të duhet pak punë sa të bëni kalimin dhe të mësoheni me adresën e re, por krijimi i një adrese profesionale për biznesin/kompaninë apo veten tuaj është një investim afatgjatë në imazhin dhe profilin tuaj profesional.

Njerëzit më njohin dhe e dinë që kjo është adresa ime

Dakord! Tani mund t’i njoftoni që keni një adresë të re dhe madje me këtë rast mund të përditësoni edhe ‘firmën’ (signature) në fund të mesazheve tuaja ku adresa juaj sigurisht do shërbejë në të mirën profesionale të biznesit/organizatës dhe sigurisht tuajën personalisht.

Mbase ne nuk i kemi mbuluar mirë arsyet/justifikimet që njerëzit kanë! Atëherë mos nguroni të jepni mendimin/argumentin tuaj te komentet këtu poshtë. Ju faleminderit.

Para disa kohësh u kërkuam lexuesve tanë që të votonin duke zgjedhur faktorët më të rëndësishëm në një shërbim hostimi. Ata votuan për ‘çmimin’, ‘suportin’, ‘lehtësia në përdorim’, si dhe kritere të tjera që në thelb përbëjnë një shërbim cilësor hostimi.

Ky shkrim ndërton mbi ato faktorë dhe njëherazi ju ndihmon të kuptoni karakteristikat dhe faktorët e tjerë që duhet të konsideroni kur jeni duke zgjedhur llojin e duhur të hostimit për faqen tuaj në internet.

Pavarësisht emërtimeve që kompanitë e ndryshme mund t’i vendosin paketave të tyre të hostimit, këto janë kategoritë kryesore të llojeve të hosteve nga të cilat ju mund të zgjidhni:

E gjetët domain-in që deshët, më pas e regjistruat por tani çfarë ndodh?

Ka një numër në rritje personash të cilët kanë regjistruar një adresë me .al apo .com dhe më pas e kanë lënë atë në pritje. Por nëse ju nuk vendosni të bëni diçka me domain-in tuaj, atëherë ajo adresë është praktikisht ‘pa vlerë’ deri në momentin që ju vendosni të ndërtoni edhe një faqe interneti.

Ndërtimi i faqes në internet ju lejon ta shfrytëzoni në maksimum potencialin informues dhe ekonomik të adresës që keni zgjedhur për biznesin, organizatën apo qoftë edhe për hobin tuaj.

Por kjo, me sa duket, është edhe pjesa më e vështirë për ata prej jush të cilët dukshëm nuk kanë arritur ta realizojnë synimin e tyre pasi e kanë lejuar adresën e tyre, jo vetëm që të qëndrojë bosh (pa një faqe interneti), por madje edhe të skadojë fare si domain (shih shembuj te faqja Expired.al).

Në gjykimin tonë, pengesat apo sfidat kryesore janë dy:

1. Zgjedhja e paketës së hostimit
2. Ndërtimi i faqes tuaj në internet

Fillimisht, duhet të pranojmë se ‘sfida e parë’ (hostimi) është më e lehtë se sa ajo e dyta (ndërtimi i faqes në internet). Prandaj, do përpiqemi t’ju japim disa këshilla praktike se si mund ta vini në jetë potencialin e domain-it që ju keni regjistruar.

Zgjedhja e paketës së hostimit

Hapi i parë, mbas regjistrimit të domain name-it, sigurisht, është gjetja e një pakete hostimi. Për t’ju ndihmuar konkretisht me këtë situatë, ju sugjerojmë të lexoni fillimisht shkrimin mbi ‘llojet kryesore të shërbimeve të hostimit’.

Për shumicën prej jush, paketat e ‘hostimit të përbashkët’ janë ideale dhe mjaft praktike për nevojat dhe nivelin teknik, sidomos nëse jeni duke e bërë këtë gjë për herë të parë.

Nëse ju e keni regjistruar domain-in tuaj pranë WebHost.al, atëherë shtimi i shërbimit të hostimit është mjaft i lehtë dhe po ashtu edhe konfigurimi (lidhja) e domain-it tuaj dhe hostimit.

Ju duhen vetëm dy elementë: a) aksesi në panelin e domain-it tuaj dhe b) adresat NS (Name Server) të hostit tuaj.

Nëse ju e keni blerë domain-in dhe hostin pranë webhost.al atëherë nuk do keni nevojë ta modifikoni informacionin e adresave NS.

Por, nëse domain-in dhe hostin i keni blerë në vende të ndryshme, atëherë do t’ju duhet që të merrni informacionin NS (Name Server) nga hosti juaj, që të mund ta regjistroni më pas këtë informacion nëpërmjet panelit të domain-it tuaj. Zakonisht, adresat NS janë të formatuara kështu:

NS1.hostijuaj.com
NS2.hostijuaj.com

Ndërtimi i faqes

Ndërtimi i një faqeje profesionale interneti është shpesh sfida kryesore me të cilën mund të përballeni por edhe ky proces është bërë relativisht më i thjeshtë. Këto janë disa nga alternativat e përgjithshme që duhet të konsideroni:

• Zgjidhni aplikacionin që ju ofron vetë hosti juaj për të ndërtuar faqen (Side builder)
• Përdorni softuerin dhe ‘template’-t që vijnë falas (WordPress, Drupal, Joomla, etj.
• Kontraktoni dikë apo një agjenci që t’ju ndihmojë të bëni diçka sa më profesionale

Në përfundim

Këto janë të gjitha vendime që kërkojnë kohën dhe përkushtimin e tyre, por e rëndësishme është që të filloni me diçka mbi të cilën, më pas, mund të përmirësoni apo krijoni diçka tjetër plotësisht të re.

Keni sugjerime apo komente? Atëherë, ju lutem kontribuoni për të mirën e të gjithë lexuesve duke i shkruar ato këtu poshtë.

Së shpejti do publikoj edhe një shkrim mbi disa aplikacione të cilat ju ndihmojnë të menaxhoni më mirë detyrat e përditshme. Por ndërkohë, desha t’ju tregoj për njërin prej tyre – ToDoIst, të cilin kam vite që e përdor.

Ky aplikacioni i vogël, por i fuqishëm, më ka ndihmuar që të menaxhoj morinë e madhe të detyrave të vogla, që duhen përmbushur çdo ditë apo sipas projektit përkatës.

Rishtazi, kompania kishte dërguar një email i cili ishte në formën e një prezantimi që ofronte një rishikim të arritjeve të çdo përdoruesi të këtij aplikacion, sipas statistikave për vitin 2014.

U habita disi por edhe u kënaqa që në një farë mënyre ky aplikacion i vogël më kishte lejuar të arrija ca gjëra që, kur i sheh në akumulative, duken disi më të mëdhaja!

Personalisht e preferoj shumë këtë aplikacion pasi ka një ndërfaqe të njëjtë në të gjitha platformat bazë qofshin këto kompjuterike po ashtu edhe mobile, dhe rrjedhimisht është i lehtë për t’u orientuar.

Aplikacioni është fantastik kur bëhet fjala për të krijuar lista me detyra apo zëra brenda një projekti apo aktiviteti të caktuar, të cilat më pas mund t’i skedulosh me data, ti filtrosh sipas prioriteteve, etj., etj. Nuk është se dua t’i bëj reklamë më shumë se sa kaq, por thjesht t’ju nxis ta provoni edhe vetë.

Kur fillova ta përdor në fillim, nuk isha edhe aq i zhdërvjellët dhe i ambientuar me opsionet që ofronte, por mbas disa vitesh them se ia kam marrë dorën, të paktën sipas tyre konsiderohem ‘ekspert’!

Këto janë disa photo nga vetë prezantimi që më kishin dërguar.

P.sh. sipas statistikave të ToDoIst, profili im renditej në 3% e përdoruesve më prodhimtarë. Ndërkohë, që vetëm gjatë vitit 2014 kisha përmbushur plot 1,197 detyra diçka te 3.3 detyra çdo ditë.

Linku direkt: Rezultatet e mia sipas ToDoist 2014

Nëse ju keni ndonjë aplikacion tjetër të preferuar, atëherë mos nguroni të ndani mendimet/përshtypjet tuaja me lexuesit e tjerë nëpërmjet komenteve këtu poshtë.

Ju faleminderit.

Ky sondazh është pjesë e një studimi që po bëjmë këtu te WebHost.al por do të pasohet me një shkrim plotësues ku do t’ju ofrojmë sugjerime dhe komente konkrete mbi shërbimet e ndryshme të hostimit.

Mund të zgjidhni më shumë se një opsion:

A ju kujtohen ditët kur për të kaluar një dokument nga një kompjuter në një tjetër ju duhej një floppy-disk, pastaj kaluam te disqet, pastaj te DVD-të, pastaj te USB-të dhe tani “bashkëlidhjet” me email? Përmirësimi dhe aksesi më i mirë në internet, si dhe teknologjitë kompjuterike janë sigurisht arsyet kryesore që situata është përmirësuar ndjeshëm.

Por, problemi mbetet, pjesërisht, i pazgjidhur, të paktën kur bëhet fjalë për transferimin e dokumenteve që janë më të mëdha se 25 MB, pra që nuk mund të transferohen lehtësisht me email.

Kjo është një listë shërbimesh dhe teknologjish që ju lejojnë të transferoni dokumente (foto, video, dokumenta, etj) nëpërmjet internetit sipas kufizimeve dhe avantazheve të ndryshme.

Dropbox është ndër shërbimet që preferoj dhe përdor më shumë, ndonëse është i kufizuar në madhësinë e hapësirës që ofron falas është mjaft praktik dhe i thjeshtë në përdorim.

Google Drive është gjithashtu mjaft praktik si dhe ka avantazhin që është i integruar brenda Gmail për ata që përdorin shërbimet e Google.

OneDrive ka të njëjtin avantazh, pra është i integruar, për ata që përdorin shërbimin e Hotmail/Outlook/Live të Microsoft-it.

WeTransfer është veçanërisht praktik pasi nuk kërkon që të jesh i regjistruar për ta përdorur. Mjafton adresa juaj e email dhe ajo e marrësit për të dërguar materiale.

Infinit funksionon njësoj si WeTransfer por ofron edhe mundësinë e dërgimit të dokumenteve nga njëri kompjuter te tjetri, që lejon transferimin e dokumenteve të mëdha me shpejtësi të lartë. Programi duhet të instalohet në kompjuter që të përdoret.

JustBeamIt është njësoj si Infinit por nuk është i detyrueshëm të instalohet për t’u përdorur pasi operohet direkt nëpërmjet lundruesit (browser-it).

Skype është gjithashtu mjaft praktik për ata që e përdorin këtë shërbim për telefonata dhe chat. Mjaft organizata me shumë punonjës e përdorin Skype si mjetin kryesor të komunikimit dhe transferimit të shpejtë të dokumenteve me të cilat punojnë.

Nëse keni sugjerime për shërbime të tjera, atëherë ju lutem mos nguroni t’i shtoni te komentet. Ju faleminderit.