Përshëndetje miq,

Nëse do jeni në Tiranë këtë fundjavë (14-15 maj), atëherë ju ftojmë të bëheni pjesë e konferencës së përvitshme OSCAL 2016 (Open Source Conference Albania). Në vitin e saj të tretë konferenca sjell folës dhe prezantues nga e gjithë bota për t’ju ndërgjegjësuar dhe nxitur për përhapjen e njohurive të hapura, softuerëve të hapur, si pjesë e një lëvizjeje botërore.

Personalisht ndihem i nderuar që do prezantoj një nga minisesionet (workshop-et) në këtë konferencë. Ndaj ju ftojë të takohemi atje madje të njiheni edhe me persona të tjerë që kontribuojnë rregullisht pas kuintave këtu te SfidaBiznesi.com

Edhe sikur të mendoni që nuk e gjeni veten në këtë botë teknikësh dhe zhvilluesish, ju siguroj që ndër ato dhjetëra prezantime do gjeni patjetër diçka që t’ju ndihmojë me zgjidhje për nevojat tuaja si profesionist apo për biznesin/organizatën tuaj.

Shihni axhendën që të bindeni: https://oscal.openlabs.cc/agenda/

Prezantimi im për Mautic (datë 15, ora 9:45AM-10:45AM)

Prezantimi im do jetë për një soft shumë pak të njohur në Shqipëri, por që është me shumë interes për ata prej jush që kërkoni zgjidhje për automatizimin e marketingut tuaj dixhital dhe që nuk keni mundësi të paguani kosto mujore shërbimi që fillojnë nga minimalisht $50/muaj deri në qindra dhe mijëra dollarë në muaj.

Aktualisht, këtë soft e përdor rregullisht për tre biznese/organizata të ndryshme.

Softi në fjalë quhet Mautic por nëse jeni vërtetë të interesuar të kuptoni se si funksionon dhe se si mund ta vini në funksion të biznesit apo organizatës tuaj, atëherë ju ftoj të bëheni pjesë e kësaj konference. Nëse nuk keni mundësi të bëheni pjesë e kësaj konference atëherë mund të më kontaktoni edhe individualisht për më shumë detaje.

Informacion për konferencën

Nëse vendosni që të merrni pjesë në konferencë (hyrja është falas, por me regjistrim):

1. Vizitoni https://oscal.openlabs.cc/ – për informacione të përgjithshme
2. Regjistrohuni këtu: https://oscal.openlabs.cc/registration/
3. Shikoni Axhendën e konferencës për të zgjedhur çfarë ju intereson: https://oscal.openlabs.cc/agenda/

Ndër gjërat që bëjmë me këtë faqe por edhe faqe të tjera është monitorimi i interesit të lexuesve tanë bazuar mbi statistikat e gjeneruara nëpërmjet Google Analytics. P.sh. faqet më të lexuara, shkrimet më të kërkuara, etj., janë njëra pjesë e vëzhgimit që bëjmë rregullisht. Pjesa tjetër e vëzhgimit realizohet nëpërmjet mesazheve me email apo kontakteve që kemi vazhdimisht me ju.

Nga vëzhgimet e deritanishme, kemi vërejtur që një pjesë prej jush vijnë në këtë faqe nëpërmjet fjalëve kyçe si p.sh.: ‘ide biznesi’; ‘si të filloj një biznes’; ‘sipërmarrja’; ‘si të hap një biznes’; etj. Ndaj, e gjykuam me vlerë t’ju sugjerojmë një shkrim që besojmë i përgjigjet interesimit të një pjese prej jush.

Kjo video sjell “11 këshilla për sipërmarrësit e rinj” nga tre ekspertë dhe profesionistë të fushës të ofruara në kuadër të një nisme nga UNDP Albania me qëllim nxitjen e vetëpunësimit.

Ekspertët në fjalë janë:

Dritan Mezini – Sipërmarrës
Dritan Mezini, eksperti në fushën e Menaxhimit të IT dhe Menaxhimit të Projekteve është shumë i qartë për të rinjtë: “Nëse ti e dashuron lirinë ti e zgjedh vetëpunësimin… Për të qenë një sipërmarrës i suksesshëm të duhen njohuri rreth profesionit dhe shumë dashuri, të dashurosh atë që dëshiron të bësh”

Ingrid Xhaja – Sipërmarrëse
Ingrid Xhaja e ka nisur rrugëtimin e saj si sipërmarrëse herët. Në këtë intervistë ajo flet për gabimet që duhen evituar nga momenti i parë kur na vjen ideja e të hapurit një biznes. “Shumë shpesh biznes plani ta hedh të gjithë planin në tokë sepse ti ke menduar diçka tjetër, por shifrat, kërkimet dhe informacionet që mbledh të tregojnë diçka tjetër. Është shumë e rëndësishme që biznes planin ta shohim me një sy shumë kritik, të mos e veshim me rozë”

Prof. Dr. Ilia Kristo – Ekspert Ekonomie
Eksperti i njohur i ekonomisë, Prof. Dr. Ilia Kristo jep disa këshilla për të rinjtë që duan të ndërtojnë biznesin e tyre. “Duhet përmendur se modeli i konsumit në Shqipëri po ndryshon. Orientimi i kërkesave të konsumatorit tashmë është kah produkteve agrare.  Kjo do të thotë që ky është sektori i parë që sipërmarrësit e rinj duhet të orientohen”.

Ky shkrim është pjesa e dytë e shkrimit: Si ta masni efikasitetin e faqes së biznesit/organizatës. Ndaj ju ftojmë të lexoni shkrimin e parë për më shumë qartësi.

Për efekt ilustrimi do të përdorim statistikat e ndërveprimit të vizitorëve me SfidaBiznesi.com

Ju sqarojmë se synimi kryesor i kësaj faqeje nuk është të gjenerojë sa më shumë vizitorë (për efekt numri) se sa lexues të mirëfilltë të cilët konsumojnë sa më shumë prej shkrimeve që ne kemi publikuar.

Sesionet – sipas imazhit të mësipërm shohim që përqindja e sesioneve/vizitave të vitit 2016 krahasuar me ato të vitit 2015 ka pësuar një rënie me -10.75%, pra ka rënë nga 2,261 sesione në vitin 2015 në 2,018 sesione në vitin 2016. Kjo nënkupton që numri total i vizitave nga viti i kaluar ka pësuar një rënie. Arsyet pse kjo metrikë ka ndryshuar negativisht lidhen me disa aspekte të mënyrës se si ne po e reklamojmë/marketizojmë faqen këtë vit. Por ju sigurojmë që kjo nuk na shqetëson, pasi siç e përmendëm metrikat duhet të jenë në funksion të synimit kryesor që ne kemi në lidhje me vizitorët e faqes tonë, i cili nuk është aq shumë sasior se sa cilësor!

Users – përdoruesit unikë apo vizitorët unikë gjithashtu kanë pësuar një rënie me nga 1,409 vizitorë unikë në 2015 në 1,334 vizitorë unikë për të njëjtën periudhë 30 ditore të krahasuar ndërmjet vitit 2015 dhe 2016. Kjo rënie me -5.32% nënkupton që nuk kemi pasur një rritje me vizitorë të rinj unikë, pra mbetet një tregues negativ që duhet përmirësuar.

Pageviews – ndërkohë ‘faqet e klikuara/vizituara’ është rritur me 142.51%. Si është e mundur kjo? Si është e mundur që në vitin 2015 për të njëjtën periudhë 30 ditore të kishim vetëm 3,063 faqe të vizituara dhe ndërkohë në vitin 2016 ky numër të jetë rritur në 7,428 faqe të vizituara. Për rastin tonë ky është edhe një tregues mjaft pozitiv dhe në përputhje edhe me synimin tonë për të rritur ndërveprimin e lexuesve tanë me shkrimet. Disa nga faktorët që kanë ndikuar pozitivisht lidhen me numrin e shkrimeve që kemi publikuar, llojet e shkrimeve, teknikat për të nxitur leximin e shkrimeve të tjera brenda faqes, përzgjedhjen e lexuesve nëpërmjet kanaleve të marketingut, ndryshimi i dizajnit, etj., etj.

Pages / Sessions – gjithashtu edhe raporti i ‘faqeve të vizituara për çdo vizitë’ është përmirësuar ku numri i faqeve që çdo vizitor ka shikuar gjatë një vizite është rritur nga 1.35 faqe për vizitë në 3.68 faqe për çdo vizitë, ose thënë ndryshe një rritje me 171.71% nga 2015 në 2016-ën. Përmirësimi i këtij raporti është rezultat direkt i statistikës bazë që është numri i ‘faqeve të vizituara’ apo ‘pageviews’.

Avg. Session Duration – Raporti i kohëzgjatjes mesatare për çdo vizitë, pra koha mesatare që një vizitor shpenzon duke shikuar faqet e brendshme është përmirësuar gjithashtu me një raport fantastik prej 758.98%, pra ka shkuar nga një kohëzgjatje mesatare prej vetëm 0.08 sekonda në vitin 2015 në 1.07 minuta për çdo vizitë që është bërë gjatë të njëjtës periudhë në vitin 2016. Ky ndryshim lidhet drejtpërdrejtë me përmirësimin e ndërveprimit të vizitorëve me përmbajtjen dhe funksionimin e faqes dhe është padyshim një raport ‘cilësor’ se sa thjesht ‘sasior’! Për faqen tonë kjo nënkupton që përmbajtja e faqes është vërtetë interesante dhe vizitorët dëshirojnë vërtetë të kalojnë kohë për t’i lexuar shkrimet.

Bounce Rate – edhe ky raport ka pësuar një përmirësim të ndjeshëm nga viti 2015 në 2016-ën me një ndryshim pozitive prej -89.46%. Thënë më qartazi, në vitin 2015 numri i personave që vizitonin vetëm 1 faqe dhe pastaj dilnin (kërcenin jashtë faqes) ishte plot 81.78% i totalit të vizitorëve, pra shumica dërmuese as që merrnin mundimin të eksploronin faqet e tjera pasi kishin parë faqen e pare, dhe vetëm diçka më shumë se 18% e tyre (pjesa tjetër) qëndronin më gjatë në faqe për të shikuar faqet e tjera. Ndërkohë, që në vitin 2016 ky raport u krye përmbys ku tani vetëm 8.62% e totalit të vizitorëve shikojnë vetëm 1 faqe dhe pastaj dalin jashtë. Pjesa tjetër, pra mbi 91% e totalit të vizitorëve qëndrojnë duke klikuar edhe në faqe të tjera të brendshme ose mesatarisht 3.68 faqe për çdo vizitë (Pages/Sessions) dhe harxhojnë mesatarisht 1.07 minuta për çdo vizitë (Avg. Session Duration).

Në përfundim

Kjo është një hyrje disi e përmbledhur e raporteve dhe metrikave që ju ofrohen nëpërmjet Google Analytics për të matur ndërveprimin e vizitorëve me faqen tuaj. Do ishte e pamjaftueshme të themi që nëse kapim një kuotë të caktuar vizitorësh, atëherë duhet të jemi të kënaqur pasi nëse ata vizitorë nuk ndërveprojnë me faqen tuaj, atëherë gjasat janë që ata nuk do kthehen më dhe po kështu do të jetë edhe probabiliteti i arritjes së objektivave tuaja në një periudhë më të gjatë.

Ju mund të jeni duke bërë një punë mjaft të mirë për të përditësuar përmbajtjen apo reklamuar faqen e biznesit/organizatës tuaj në internet.

Por sa efikase është puna juaj?

Çfarë kriteresh përdorni që ta masni efikasitetin e faqes në funksion të objektivave të biznesit apo organizatës tuaj?

Nëse puna juaj është thjeshtë një përpjekje për t’i bërë qejfin vetes apo shefit atëherë kjo mbase mjafton! Por nëse faqja i shërben vizitorëve tuaj, atëherë efikasiteti i vërtetë i punës tuaj varet nga ndërveprimi i vizitorëve me faqen tuaj!

Ndërveprimi i tyre = përmbushja e funksionit të faqes për biznesin/organizatën tuaj! A jeni duke e matur këtë ndërveprim?

Si marketier dhe uebmaster insistoj që ta lidh çdo faqe që menaxhoj me shërbimin e Google Analytics. Ky shërbim mundëson mbledhjen dhe matjen e statistikave të faqeve, pra ndërveprimin e vizitorëve me faqen tuaj.

Fakt: 50-70% e faqeve më të mëdha në internet përdorin Google Analytics dhe shumica e ekspertëve e përdorin gjithashtu sepse është ndër më të mirat dhe vlera e këtij shërbimi është e pamatshme edhe për faktin që është pa pagesë!

Atëherë, si mund ta masni ecurinë e faqes tuaj?

Një nga mënyrat më të lehta që keni për ta matur ecurinë e faqes tuaj, është duke i krahasuar statistikat e gjeneruara nga Google Analytics me ato të një muaji apo një viti më përpara. Ju sigurisht mund të vendosni edhe objektiva të qarta për numrin total të vizitorëve që dëshironi të arrini apo të keni objektiva që lidhen me rritjen e vizitorëve nga burime specifike si p.sh. vizitat organike, vizitat e drejtpërdrejta, ato të referuara nga faqe të tjera, ato të referuara nga mediat sociale, etj.

Për rastin tonë dhe për efekt qartësie nuk do fokusohemi te përdorimi i ‘krahasimit’ të statistikave sipas dy periudhave kryesore për të kuptuar se si po shkojnë gjërat.

Metrikat kryesore të matjes së ndërveprimit (statistikat)

Google Analytics në ‘dashboard’-in e vetë zakonisht jep 6 metrika kryesore (brenda  ka shumë të tjera):

Sessions – ‘sesionet’ apo ‘vizitat’

Sessions – këto mund t’i quajmë ‘sesionet’ apo ‘vizitat’ sipas preferencës, pasi të dyja përkthimet e termit besoj se përçojnë qartë konceptin bazë. Sesionet përfaqësojnë numrin total të vizitave që janë realizuar në faqen tuaj për një periudhë të caktuar. Zakonisht, Google Analytics ju tregon statistikat për 30 ditët e fundit.

Users- ‘përdoruesit apo vizitorët unikë’

Users – këta janë ‘përdoruesit apo vizitorët unikë’. Ndryshimi me ‘sesionet’ është fakti që një ‘përdorues’ mund të bëjë disa ‘vizita/sesione’ në një periudhë të caktuar. P.sh. unë si ‘përdorues/vizitorë unik’ mund të futem për të vizituar një faqe të caktuar një apo disa herë brenda një periudhe të caktuar, p.sh. brenda 30 ditëve të fundit. Pra një person mund ta vizitojë të njëjtën faqe disa herë gjatë muajit. Kjo përkthehet në disa ‘sesione’ por vetëm në një ‘përdorues/vizitor unik’. Rrjedhimisht, për efekt të metrikave që mblidhen dhe llogariten nga Google Analytics, unë (si vizitor) raportohem si ‘1 vizitor unik’ që ka realizuar ‘disa sesione/vizita’ brenda një periudhe tw caktuar, zakonisht 30 ditët e fundit.

Pageviews – apo faqet e vizituara/klikuara/ shikuara/këqyrura

Pageviews – apo faqet e klikuara/ shikuara/këqyrura – vendoseni ju! Kur jam përpjekur t’ia shpjegoj këto statistika kryeredaktorit të një gazete, ai e kishte më të lehtë që ta kuptonte konceptin e ‘pageviews’ si ‘klikime’ që bëhen brenda faqes. Pra sa herë që një ‘vizitor’ viziton faqen tuaj në internet, ai ‘klikon’ për të shkuar nga njëra faqe në tjetrën, dhe rrjedhimisht gjeneron ‘klikime’ apo ‘pageviews’ brenda faqes. Besoj se jemi ende në kohë për të caktuar një term më të saktë në shqip, por besoj se edhe nëse themi ‘shikime’ apo mund të përdoret edhe fjala e bukur gege ‘kqyrje’. Pse maten ‘pageviews’ ? Ato ju ndihmojnë të kuptoni popullaritetin e vetë faqes tuaj, pasi sa më shumë të tilla të keni, aq më shumë ju kuptoni që shkrimet dhe materialet tuaja po lexohen/shikohen.

Pages/Sessions – raport i ‘faqeve të shikuara për çdo vizitë/sesion’

Pages/Sessions – ky raport i ‘faqeve të shikuara për çdo vizitë/sesion’ synon t’ju japë një mesatare të numrit të faqeve që janë klikuar/shkuar për çdo sesion. Pra, ky raport nxjerr një mesatare të numrit të faqeve që unë si ‘vizitor’ ‘klikoj’ apo vizitoj gjatë një ‘vizite’ normale. Rëndësia e këtij raporti lidhet me faktin që sa më i lartë të jetë numri i faqeve të klikuara/vizituara, aq më i lartë konsiderohet të jetë edhe angazhimi (engagement) i vizitorëve tuaj me materialet e publikuara në faqen tuaj. Thënë ndryshe, kur ky raport është i lartë atëherë ju mund të nënkuptoni që përmbajtja e faqes tuaj është vërtetët interesante aq sa vizitorët kanë dëshirë të kalojnë kohë për të konsumuar. Pra nuk vijnë për të parë vetëm një faqe dhe pastaj largohen.

Avg. Session Duration – Mesatarja e kohës së shpenzuar për sesion

Avg. Session Duration – ky raport ju tregon mesataren e kohës që një vizitor shpenzon në faqen tuaj. Ideja është që nëse koha që vizitorët kalojnë në faqen tuaj është e ulët, atëherë gjasat janë që përmbajtja apo prezantimi i faqes tuaj nuk është aq interesant sa t’i nxisë ata të kalojnë kohë të mjaftueshme për ta konsumuar.

Bounce rate – raporti i vizitorëve me 1 vizitë (vizitë teke)

Bounce rate – ky raport ju ndihmon të kuptoni se sa përqind e vizitorëve tuaj futen dhe largohen pa vizituar faqe të tjera. ‘Bounce’ përkthehet si ‘kërcim apo dalje jashtë faqes’ që në rastin tonë përdoret me kuptimin e vizitorëve që futen dhe pastaj ‘kërcejnë’ apo dalin nga faqja pasi kanë parë vetëm një faqe, pa klikuar/vizituar faqet e tjera. Një normë e mirë është që ky raport të jetë sa më poshtë kuotës 50%, pra kur gjysma e vizitorëve tuaj ndalojnë mjaftueshëm dhe vizitojnë më shumë se një faqe.

Lexoni edhe pjesën e dytë: Si t’i interpretoni metrikat kryesore të ndërveprimit?

Një nga aspektet aq shpesh të neglizhuara është komunikimi me respekt, mund të themi thjesht komunikimi, por veçanërisht në kulturën shqiptare të biznesit duhet theksuar edhe respekti në komunikim pasi përplasjet apo diferencat ndërmjet shtresave kulturore, intelektit apo edhe bindjeve morale i bëjnë njerëzit që të diskriminojnë në sjelljen dhe njëherazi në komunikimin e tyre. Ka një mori modelesh komunikimi por aktualisht dua të prek shumë shkurt dy prej tyre.

Komunikimi brenda biznesit

Përsa i përket komunikimit brenda biznesit, d.m.th komunikimi me kolegët apo eprorët me nënpunësit, duhet mbajtur gjithnjë një komunikim i hapur ku mund të diskutohen dhe debatohen idetë, sugjerimet, komentet apo edhe ndryshimet e mendimeve të njërës palë me tjetrën.

Ky lloj komunikimi ku respektohen mendimet dhe idetë e tjetrit, ku pranohen edhe idetë e kundërta, jo thjesht si urdhëra për t’u bindur por minimalisht për t’u konsideruar, ndihmon në krijimin e kushteve ku mbështetet zhvillimi i mëtejshëm i biznesit, i risive, i shërbimit dhe produkteve që ofron ky biznes.

Komunikimi me klientët

Sërish, mungesa e respektit në komunikimin me klientin është një situatë e vështirë në të cilën gjendet biznesi shqiptar. Arsyet janë nga më të ndryshmet, por kryesisht janë për arsye përzjerje shtresash të ndryshme sociale dhe kulturore brenda vendit të cilat domosdo çojnë edhe në keqkuptime dhe mungesë respekti për tjetrin, ku në rastin tonë i bie të jetë klienti!

Koncepti perëndimor i marrëdhënies dhe trajtimit të klientit përmblidhet shumë qartazi nga shprehja “klienti është mbret” dhe ashtu duhet të jetë realisht edhe në ambientet e biznesit shqiptar ku klienti duhet vënë i pari mbi preferencat apo bindjet zakonore të atij që e ka biznesin (pronarit). Gjithësesi, duhet të pranojmë që çdo gjë kërkon kohën e vetë dhe brumosja e vlerave të mirëfillta të respektit ndaj klientit, dhe veçanërisht komunikimit me respekt për klientin, i duhet koha e vet.

Është e pamundur ta trajtosh të plotë këtë temë, por si fillim mund t’ju themi se një nga synimet e kësaj faqeje është pikërisht përçimi dhe përhapja e këtyre ideve dhe konsumimi i tyre me një audiencë në rritje për të pasur një ndikim sa më të gjerë.

Ndonëse në ditët e sotme në internet ka shumë tipe faqesh që kryejnë një shumëllojshmëri funksionesh apo përmbushin synime të ndryshme, për rastin tonë do prezantojmë kategoritë bazë të faqeve të biznesit.

Thënë ndryshe: nëse ju jeni duke menduar të krijoni apo keni sakaq një faqe e cila është në funksion të biznesit tuaj, synimi (kategorizimi i faqes) është baza mbi të cilën mund të vlerësohet më mirë funksionimi dhe efikasiteti i vetë faqes.

Sqarim: Këtu nuk po flasim për faqet në Facebook (shih shënimin në paragrafin e fundit)

Tregti online (e-commerce)

Funksioni kryesor i këtyre faqeve është mundësimi i shitjes së produkteve dhe shërbimeve të ndryshme që ofron biznesi juaj direkt nga faqja, pra pa pasur nevojë që klienti të paraqitet pranë dyqanit apo zyrave të biznesit përkatës. Ndonëse ende në fillimet e veta këto lloj faqesh po përhapen relativisht shpejt edhe në Shqipëri, por ekzistojnë ende mjaft pengesa për zhvillimin e shpejtë të këtyre lloj faqesh.

Dy shembuj (ShtepiaeLibrit.com; Neptun.al; etj)

Gjenerimin shitjesh (lead generation)

Këto lloj faqesh, në pamje të parë nuk duket se ndryshojnë shumë nga faqet për shitjet online, por në fakt funksioni i tyre kryesor është ai nxitës/reklamues pasi shitja e produkteve apo shërbimeve ndodh tjetër kund. Për shembull, një faqe e cila reklamon rrobat apo shërbimin e konsulencës, por nuk e shet këtë shërbim direkt nëpërmjet faqes online, në fakt u ofron klientëve potencialë të kompanisë mundësinë që të vihen në kontakt direkt me përfaqësuesit e saj për të përfituar produktin apo shërbimin e dëshiruar. Kontakti me kompaninë bëhet më pas me email, telefon, duke vizituar dyqanin/zyrën e biznesit, etj. (Shembuj janë shumica e faqeve të agjencive imobiliare, turistike, etj).

Publikime të ndryshme

Rasti më tipik i këtyre lloj faqesh janë gazetat apo revistat e ndryshme të cilat sigurisht ofrojnë shkrimet dhe publikimet e tyre për lexuesit e ndryshëm. Ky model biznesi funksionon nëpërmjet shitjes së abonimeve online për lexuesit e ndryshëm ose/dhe shitjes së hapësirave reklamuese te bizneset e tjera apo palët e treta, të cilat efektivisht i përdorin këto faqe për t’i vënë në funksion të gjenerimit të shitjeve për produktet apo shërbimet që ata ofrojnë nëpërmjet faqes së tyre ose pikave të shitjes/zyrës, etj.

Ndihmë ndaj klientit (support)

Ndonëse disi më pak i njohur për audiencën shqipfolëse, funksioni i këtyre lloj faqesh është lehtësisht i kuptueshëm. Nëse biznesi apo kompania juaj ofron një shërbim apo produkt të caktuar, funksioni i kësaj lloj faqeje është t’u ofrojë mbështetje klientëve tuaj ekzistues dhe potencialë në lidhje me nevojat/pyetje që ata kanë në lidhje me produktin apo shërbimit tuaj. Një rast mjaft tipik dhe i mirënjohur është faqja e DigitAlb-it kur një pjesë e mirë e funksionit të saj i përkushtohet mbështetjes së klientëve ekzistues me informacione dhe përgjigje për problemet që ata kanë si abonentë. Këto lloj faqesh ofrojnë informacione teknike ose forume ku klientët mund të gjejnë zgjidhjet që u nevojiten.

Branding (imazhi i kompanisë)

Ndonëse, ky është një nga funksionet më bazë të çdo faqeje interneti nëpërmjet të cilit përçohet imazhi dhe emri i kompanisë (branding) te klientët ekzistues dhe ata potencialë. Efektivisht, çdo faqe interneti është një faqe që ka për funksion “branding” – pra përçimin e imazhit dhe përhapjen e emrit të kompanisë apo biznesit përkatës te një audiencë sa më e gjerë. Edhe një faqe e thjeshtë kontakti, në fakt është faqe që përçon imazhin tuaj te klientët, pra duhet treguar kujdes që imazhi juaj të jetë gjithnjë i kuruar!

Faqet në Facebook

Një numër i madh biznesesh duket sikur e kanë “zgjidhur” problemin e faqes online me një faqe në Facebook. Por, duhet sqaruar se Facebook nuk është gjë tjetër veç se një rrejt social (sigurisht më i madhi aktualisht) por që nuk duhet të mbetet si burimi kryesor i prezantimit tuaj online, pasi kjo përmban shumë rreziqe ndër të cilat mund të përmendim a) Facebook mund t’i ndryshojë rregullat kur të dojë, mund t’ju penalizojë, kufizojë ose rrisë kostot e përdorimit; b) jo të gjithë klientët tuaj ekzistues apo potencialë janë në Facebook; c) Facebook është sot për sot rrjeti më i madh social në botë, por edhe për sa kohë! d) etj.

Në përfundim

Duhet të sqarojmë se synimi i një faqeje nuk mund të jetë i kufizuar vetëm në funksionin kryesor të saj, por përcaktimi i synimit (apo kategorizimi) i faqes është baza mbi të cilën mund të vlerësohen mirëfunksionimi dhe efikasiteti i vetë faqes.

Keni ndonjë sugjerim për ndonjë tip tjetër faqeje? Mos nguroni ta sugjeroni te komentet…

Këtë fundjavë (2 prill 2016) pata nderin të isha ndër prezantuesit e parë në mbështetje të programit “Mozilla Tech Speakers Tirana #1”, organizuar nga Open Labs.

Edhe pse jo zyrtarisht, aktiviteti u përshëndet edhe nga ministrja aktuale e Inovacionit – Znj. Milena Harito e cila përshëndeti pjesëmarrësit dhe i përgëzoi të gjithë për iniciativa të tilla.

Mozilla Tech Speakers është një program ku aktivizohen prezantues dhe ligjërues, kryesisht brenda komunitetit të Mozilla, të cilët ofrojnë trajnime dhe mentorojnë pjesëmarrësit (shumica studentë) për t’i ndihmuar ata të rriten në aftësitë e tyre prezantuese në skenë, si nga ana oratorike, si dhe teknike.

Aktiviteti organizohet nën çadrën e komunitetit OpenLabs që është një organizatë shqiptare jo qeveritare, jo fitimprurëse, e cila promovon iniciativa free libre open source që prej vitit 2012.

Personalisht kam pasur nderin të isha pjesëmarrës që në takimet e tyre të para dhe mbetem entuziast për kontaktet dhe bashkëpunimet ndër vite.

Entuziazmi im vjen edhe nga fakti që vetë (edhe pse jo me sfond si zhvillues) mbetem një përdorues i hershëm i platformave dhe softeve ‘open source’ si WordPress, Mambo, Joola, PrestaShop, Mautic, etj., dhe besoj shumë në potencialin e këtyre teknologjive për zhvillimin e individëve dhe vendit në përgjithësi.

Organizatorët e OpenLabs

Redon Skikuli, Elio Qoshi, Greta Doci, etj janë personat që qëndrojnë prapa kësaj organizate dhe aktiviteteve të shumta si pjesë e promovimit të iniciativave free libre open source. Janë vertëtë një ekip fantastik djemsh dhe vajzash që sugjeroj t’i ndiqni edhe ju.

OSCAL 2016 – Aktiviteti më i madh vjetor për Open Source në Shqipëri

Në data 14 & 15 maj, do të zhvillohet aktiviteti më i madh vjetor për Open Source në Shqipëri. Kjo konferencë vjetore sjell disa nga prezantuesit dhe aktivistët më të spikatur të komunitetit Open Source nga e gjithë bota dhe prezantime janë thjesht fantastike.

Këtë vit kam nderin të jem edhe vetë si një ndër prezantuesit e seminareve të vogla, ku prezantimi im do të përqëndrohet në përdorimin dhe avantazhet e softit Mautic – Open Source Marketing Automation Software.

Ndërkohë, ju ftojmë që të bëheni pjesë e kësaj konference duke u regjistruar si dhe duke ndjekur zhvillimet më të reja në faqen zyrtare të konferencës.

Dy shkrime anglisht

Redon Skikuli: Mozilla Tech Speakers in Tirana 1

Elio Qoshi: Mozilla Tech Speakers Tirana #1 (Report)

#OSCAL2016 Tweets

Richard Branson është themeluesi dhe drejtuesi ekzekutiv i Virgin Group, që përfaqëson mbi 400 biznese të suksesshme në sektorë nga më të ndryshmit. Suksesi i tij në biznes është prova mbi të cilën këshillat e tij për biznesin marrin vërtetë vlerë qoftë edhe nëse i konsideroni ato thjesht teorikisht.

Eksperienca e gjatë, si dhe aftësia për të komunikuar qartë e saktë, e kanë lejuar të dallohet edhe në sferën e shkrimeve me këshilla për biznesin. Pikërisht një prej shkrimeve të tij (Five top tips to starting a successful business), e kemi përkthyer për këtë rast. Përveç hyrjes sonë; titulli dhe përmbajtja e mëposhtme janë nga shkrimi i tij.

Këtu mund të lexoni edhe një shkrim tjetër titulluar: 9 hapa si të krijojmë një biznes të suksesshëm

Autor: Richard Branson

1. Dëgjoni më shumë se sa flisni

Ne kemi dy veshë dhe një gojë, ndaj edhe përdorimi i tyre në proporcion nuk është një ide e keqe! Për të qënë një udhëheqës i mirë ju duhet të jeni edhe një dëgjues i mirë. Idetë e shkëlqyera mund të vijnë nga burimet më pak të pritshme, ndaj edhe duhet t’i mbani veshët gjithnjë të hapur ndaj këshillave të vlefshme. Kjo nënkupton që mbase duhet t’i ndiqni komentet nëpër faqet online me të njëjtin interes sa edhe shënimet e takimeve të bordit drejtues, ose t’i pyesni punonjësit që janë direkt në kontakt me klientët për opinionin e tyre po aq sa edhe Drejtorët e Përgjithshëm. Dil jashtë dhe bëhu i dëgjueshëm ndaj njerëzve për të mësuar prej tyre.

Për më shumë, ju ftoj të lexoni një shkrim tjetër ku autor shpjegon nga e ka marrë ai idenë për këtë këshillë, plus një shkrim tjetër ku propozohet e njëjta ide.

2. Mbajini gjërat të thjeshta

Për t’u dalluar në biznes shpesh të duhet të gjesh zgjidhje radikale. Por askush nuk tha që për t’u dalluar duhet të gjesh patjetër një zgjidhje komplekse. Aktualisht ka me mijëra zgjidhje të thjeshta biznesi për probleme të ndryshme që presin të marrin zgjidhjen e re dhe të madhe të biznesit. Mbi të gjitha, duhet të kesh një përqëndrim drejt risive (inovacionit), por pa u përpjekur që të rikrijosh rrotën. Një ndryshim i vogël që sjell përmirësim është më i efektshëm se sa pesë ndryshime të komplikuara që e bëjnë situatën edhe më keq.

Për më shumë ju ftoj të lexoni një shkrim tjetër ku ky koncept shtjellohet edhe më tej. Ja dhe një shkrim tjetër shumë interesant nga Inc.com.

3. Jini krenar për punën tuaj

Javën e kaluar mora pjesë në aktivitetin e përvitshëm “Virgin Stars”, ku vlerësojmë disa prej njerëzve që kanë punuar më fortë nëpër kompanitë e grupit Virgin. Pavarësisht të gjitha kompanive tona, kombësive dhe personaliteteve të ndryshme të mbledhur të gjithë nën një çati, ishte veçanërisht me interes të shihje se çfarë ato kishin të përbashkët. Një prej tyre ishte krenaria për punën e tyre, si dhe në kompaninë që ata përfaqësonin. Mos e harroni kurrë që personeli juaj janë në fakt mbështetësit më të mëdhenj të brandit (emrit) tuaj dhe kur ju i kushtoni vëmendje krenarisë së tyre në punë bën që kjo të tregohet menjëherë në mënyrën se si ata trajtojnë klientët tuaj.

Për më shumë ju ftoj të lexoni edhe këtë shkrim që tregon mbi arsyet pse Rikardi sugjeron që të jemi krenar për punën tonë.

4. Zbavituni, suksesi do të vijë më vonë

Nëse puna që po bëni nuk ju jep kënaqësi, atëherë gjasat janë që jeni duke e bërë gabim! Nëse në mëngjes, kur zgjoheni, ju duket sikur po shkoni të bëni detyrën, atëherë mbase ka ardhur momenti për të bërë diçka tjetër. Në qoftë se ju jeni duke ia kaluar mirë, atëherë gjasat për krijimin e një atmosfere pozitive dhe plot risi do jenë edhe më të larta dhe kështu edhe biznesi juaj do të përparojë. Një buzëqeshje dhe një shaka mund të bëjnë shumë më mirë, ndaj mos nguroni të shikoni edhe anën zbavitëse të punëve.

Për më shumë ju ftoj të lexoni një shkrim tjetër që eksploron mënyrat se si vetë Brandson zbavitet.

5. Bëjeni copa-copa dhe filloni nga e para

Nëse jeni një sipërmarrës të cilit nuk i del me sukses sipërmarrja e parë, atëherë mirë se erdhët në klubin tonë! Çdo biznesmen i suksesshëm ka përjetuar dështime në udhëtimin e vet – ajo që ka rëndësi është se si ju mësoni prej këtyre eksperiencave. Mos u dekurajoni nga një apo disa dështime, përkundrazi, ngrihuni sërish në këmbë, pastrohuni, dhe përpiquni të kuptoni se çfarë nuk funksionoi. Në atë moment do arrini të gjeni pikat pozitive, analizoni pikat ku mund të përmirësoheni, pastaj bëjeni copa-copa nismën tuaj dhe filloni nga e para.

Për më shumë ju ftoj të lexoni një shkrim tjetër ku vetë Rikardi shpjegon se si do t’i fillonte gjërat nga e para.

Vs. marketingut ‘alla shqiptarçe’!

Marketingu i suksesshëm minimalisht synon të ndërtojë marrëdhënie nëpërmjet komunikimit me disa kanale dhe kontaktit të rregullt e të vazhduar (kundrejt marketingut sporadik, me rast festash)! Këto dy karakteristika besoj se e dallojnë shumë nga marketingu sporadik apo ‘alla shqiptarçe’ që zhvillohet gjerësisht në tregun shqiptar. Duhet të pranojmë se prirja është drejt përmirësimit, por sigurisht që mbetet ende mjaft punë për të bërë.

Në tregun shqiptar ka mjaft agjenci të vogla dhe të mëdha që ofrojnë shërbime “marketingu” por në fakt bëjnë thjesht promovim (reklamë). Atyre nuk u interesojnë klientët tuaj dhe aq më pak synojnë t’ju ndihmojnë të ndërtoni një marrëdhënie të shëndetshme me ta. Fundja kjo është përgjegjësia juaj dhe nëse ju zgjidhni t’i bini për shkurt duke i shpartalluar klientët tuaj (qofshin ekzistues apo potencialë) me reklama fushate, kjo sigurisht që mbetet në dorën tuaj!

Marketingu i suksesshëm, nuk orientohet thjesht nga reklama, por drejt marrëdhënies!

Në thelb, askush nuk bën biznes me produktet apo shërbimet që ju ofroni, ata bëjnë biznes me ju! Ata, klientët, fiksojnë ‘brandin’ tuaj dhe krijojnë marrëdhënie besimi me njerëzit që e përfaqësojnë atë. Është thjesht njerëzore dhe bazohet te marrëdhënia e besimit! Në këtë rast, besimi fokusohet te ‘brandi’ juaj dhe nëse ju e abuzoni marrëdhënien tuaj me klientët, atëherë aq më të lehtë do ta kenë ata që ta neglizhojnë marrëdhënien me ju apo t’ju shmangin tërësisht!

Pse vendosa të shkruaj për këto dy karakteristika të marketingut?

Pak ditë më parë “Shyqyriu” më kishte shkruar në Inbox-in e Facebook-ut për të kërkuar tarifat e fushatës me email marketing për një shërbim e-commerce. Dukshëm ishte një kërkesë urgjente ( dërguar në ora 20:54) pasi pak minuta më vonë nuk vonoi as telefonata nga i njëjti person!

Më konkretisht, kërkesa ishte për tarifën e shërbimit për një fushatë promovuese me email drejt 100,000 adresave që duhet të zgjaste 7-10 ditë!

Qartazi, personi që kishte telefonuar nuk e kishte marrë mundimin të lexonte ndonjë nga shkrimet që shpjegojnë qëndrimin e deklaruar kundër promovimit me adresa email të vjedhura, apo siç njihen ndryshe me mesazhe SPAM. Këto lloj shërbimesh janë mjaft tërheqëse për ato biznese që bëjnë marketing ‘alla shqiptarçe’ dhe kujtojnë se do e rrisin vlerën e emrit/brandit të tyre apo do të shesin produkte duke bërë SPAM. Fakti mbetet që është tërësisht gabim dhe normalisht duhet të jetë plotësisht ‘e paligjshme’ edhe pse në Shqipëri ky është ende një koncept i huaj!

Pa shprehur kahje politike, por thjesht si shembull, marketingu ‘alla shqiptarçe’ është sipas modelit të partive politike. Ky model orientohet nga një lloj strategjie marketingu që thotë: “NE bëjmë fushatë sa herë kemi nevojë për votat tuaja dhe do t’ju bombardojmë me reklama dhe fushata deri sa të na e jepni! Fundja, nuk ju duam për gjë tjetër!!!”

Biseda telefonike me personin e sipërpërmendur ishte e shkurtër, por me aq sa munda i sugjerova që buxhetin ta shfrytëzonte për të ofruar reklama të shënjestruara (targetuara) në Facebook ose diku tjetër online.

Çfarë do sugjeroja po të kisha pasur pak më tepër kohë?

Marketingu nuk mund të kufizohet vetëm në një kanal si p.sh. marketingu me email, por duhet të shfrytëzojë të gjitha kanalet kryesore bazuar mbi vendndodhjen e audiencave që ju po shënjestroni. Thënë ndryshe, biznesi/organizata juaj duhet të jetë rregullisht e pranishme me synim ndërtimin e një marrëdhënie të vlefshme me audiencën tuaj. Në botën dixhitale kjo gjë arrihet duke shfrytëzuar të gjitha kanalet ku audienca juaj ndodhet.

Kostot e komunikimit/promovimit janë sigurisht një sfidë që ju kufizon disi, por me ardhjen e ‘mediave sociale’ kjo sfidë tashmë është më tepër çështje menaxhimi se sa kufizimi financiar. Pra, nëpërmjet mediave sociale dhe kanaleve të ngjashme virtuale ju keni mundësi të jeni të pranishëm me audiencën e synuar njësoj si kompanitë e mëdha me buxhete të mjaftueshme. Ndaj, sfida mbetet menaxhimi!

Eksperienca ka treguar se reklamat online janë gjithmonë më të lira dhe shpesh më efikase si forma marketingu. Gjithashtu, eksperienca e marketierëve më të mirë në botë ka treguar që reklama apo fushata juaj duhet të jetë sa më e shënjestruar (targetuar) sipas audiencës së synuar. Ndaj, nëse nuk e keni menduar ende atëherë mund të filloni të konsideroni disa alternativa:

• reklamat në faqe të ndryshme online (gazeta, revista, etj. sipas audiencës);
• reklamat me Google Ads;
• reklamat me LinkedIn;
• reklamat me Facebooks Ads (që e përmendëm);
• reklamat në spotet WIFI nëpër qytetet kryesore (na kontaktoni për më shumë info);
• marketing me email me listën që ju ndërtoni vetë;

Në përfundim!

Në përfundim, dyshoj se situata që përmenda pak më sipër ishte më tepër një çështje e lënies së gjërave në momentin e fundit dhe sigurisht e modelit ‘alla shqiptarçe’! Nuk ishte aspak e shënjestruar dhe sigurisht nuk kishte për synim të ndërtonte një marrëdhënie me ata 100,000 klientë potencialë që do të bezdiste!

Personalisht mbetem mbështetës i mirëfilltë i marketingut me email (email marketing) dhe besoj se po të përdoret siç duhet, atëherë mund t’i sjellë mjaft avantazhe jo vetëm biznesit/organizatës tuaj por mbi të gjitha marrëdhënies afatgjatë me klientët tuaj. Por, marketingu me email është vetëm një pjesë e atij që mund të quhet marketing i suksesshëm! Marketingu i suksesshëm minimalisht synon të ndërtojë marrëdhënie nëpërmjet komunikimit me disa kanale dhe kontaktit të rregullt e të vazhduar!

Nëse e mendoni ndryshe, jeni gjithnjë më se të mirëpritur që të jepni komentet/sugjerimet tuaja më poshtë. Do i mirëprisnim edhe eksperiencat tuaja.

Nëse keni ndonjë pyetje më specifike mos nguroni të na kontaktoni direkt!

Zakonisht, çdo javë, synoj të dërgoj të paktën një mesazh marketingu me email te lista të ndryshme abonentësh. Janë të paktën 10,000 abonentë të ndryshëm (legjitimë) të shpërndarë në lista dhe faqeve të ndryshme biznesesh dhe organizatash. Po pse përpiqem ta bëj këtë gjë rregullisht?

Mbaes e keni dëgjuar ose edhe mbase e besoni por fakti mbetet që Marketingu me email ka shumë përfitime dhe këto janë vetëm tre ndër avantazhet kryesore:

1. Komunikimi direkt me abonentët/klientët tuaj;

2. Vlera më e mirë e kthimit të investimit (ROI) në marketing ;

3. Ndërtimi i marrëdhënie & komunikimi me klientët tuaj.

Komunikimi direkt me abonentët/klientët tuaj

Kur ju dërgoni një mesazh me email, ai shkon direkt në ‘inbox’-et e klientëve tuaj ekzistues apo potencialë dhe ata mund ta lexojnë atë në kohën dhe monemtin më të volitshëm për ta. Rrjedhimisht ju mund të komunikoni direkt me ta dhe të siguroheni që mesazhi juaj nuk humbet në morinë e njoftimeve pa fund që ata marrin në mediat sociale apo kanalet e tjera ku ata shkojnë të informohen apo zbaviten online.

Vlera më e mirë e kthimit të investimit (ROI)

Raporte dhe studime të shumta kanë vërtetuar se ndërtimi i një liste kontaktesh me klientët tuaj dhe investimi për t’u dërguar atyre mesazhe/fushata marketingu të rregullta është ndër investimet me kthimin më të mirë. Thënë ndryshe nëse harxhoni 5,000 lekë/muaj për të menaxhuar listën dhe dërguar mesazhe javore apo mujore, atëherë potenciali i kthimit të investimit tuaj është vetëm në rritje dhe zakonisht ju mund t’i nxirrni lekët e investuara (në muaj) me çdo fushatë që dërgoni pasi ata klientë që marrin reklamën tuaj zakonisht blejnë sepse ju njohin ju dhe produktet/shërbimet tuaja. Rrjedhimisht edhe ju e rikuperoni investimin ne ‘marketingun me email’ lehtësisht, mbase që në shitjen e parë.

Ndërtimi i marrëdhënies dhe komunikimi

Edhe pse në gjykimin tim, ndërtimi i marrëdhënies dhe komunikimi i drejtpërdrejtë duhet të jenë ndër funksionet kryesore të marketingut, kur flasim për marketingun me email nënkuptojmë një komunikim me mesazhe që i shkojnë klientëve tuaj ekzistues apo potencialë. Synimi i mesazheve duhet të jetë ndërtimi i një marrëdhënie të vlefshme për ju dhe klientët tuaj, pasi askush nuk dëshiron të marrë vetëm ‘reklama’ dhe askush nuk do që t’i kushtojë kohë mesazhit tuaj thjesht sepse i ka ardhur në inbox. Sot, çdokush merr një mori shumë të madhe mesazhesh në inbox dhe rrjedhimisht edhe interesi apo koha që i kushtohet çdo mesazhi bie ndjeshëm. Por, çdokush, është gjithmonë i gatshëm t’i kushtojë më shumë kohë një mesazhi që i vjen nga dikush që e njeh apo me të cilin ka një marrëdhënie personale apo pune! Në rastin e mesazheve që ju mund të dërgoni si biznes apo organizatë, ato duhet të jetë informative, edukative, zbavitëse dhe gjithsesi të vlefshme për lexuesin, në të kundërt përfundojnë në kosh!

Menaxhimi i listave me abonentë

Siç e përmenda, kontaktet/adresat që menaxhoj nuk janë të gjithë në një listë dhe as në një platformë. Ato menaxhohen në mënyra të ndryshme dhe janë në vartësi të ‘madhësisë së listës’ dhe ‘periodicitetit të dërgimit’.

P.sh. lista e klientëve te ShtepiaeLibrit.com merr mesatarisht një mesazh dy herë në muaj, ndërkohë që SfidaBiznesi.com (pra kjo listë) merr një mesazh çdo javë, ndërkohë që te AlbanianBlogger.com lexuesit marrin një mesazh mesatarisht një herë në muaj. Ndërsa lista të tjera (që nuk do desha t’i përmend me emër këtu) variojnë nga një mesazh çdo javë apo çdo dy javë.

Pagesa sipas madhësisë së listës

Shumë biznese dhe organizata nuk përdorin platforma për dërgimin e mesazheve pasi zakonisht kanë lista të vogla me disa dhjetëra apo qindra. Por, shtrëngimi i rregullave për dërgimin e mesazheve si rrjedhojë e luftës kundër mesazheve SPAM, ka bërë që edhe mundësia e dërgimit të mesazheve te mbi 30 apo 50 kontakte njëherësh të jetë e kufizuar për shumë organizata apo biznese. Kufizimi mund të jetë në bazë të ISP-së që menaxhon adresat tuaja, apo të vetë shërbimit të Email që ju përdorni apo edhe faktorë të tjerë.

Rrjedhimisht, ato biznese apo organizata që kanë nevojë të komunikojnë me qindra apo mijëra kontakte njëherësh kanë nevojë të përdorin shërbime të dedikuara për këtë funksion.

Dërgimi i mesazheve në masë është një nga funksionet më bazike të ‘marketingut me email’ dhe sot ka mjaft shërbime të tilla për “email marketing” të cilat ofrojnë shërbim falas për lista më të vogla se 2,000 kontakte/adresa por që pastaj imponojnë një kosto shtesë kur kalohet pragu. Në rastin e listave që ju përmenda një pjesë e tyre menaxhohen nëpërmjet shërbimeve si MailChimp.com; WordPress.com; dhe Sendy.co. Pjesa tjetër janë të vetëhostuara por dërgohen nëpërmjet shërbimeve si Amazon SES, SendGrid.com, etj.