Disa foto nga aktiviteti
Përshëndetje miq!
kësaj radhe patëm kënaqësinë t'ju sjellim një prezantues të veçantë si z. Redon Skikuli i cili foli mbi temën "Si të zhvilloni një biznes me Open Source".
Ky prezantim erdhi si pjesë e një kolane prezantimesh të hapura të organizua ndërmjet SfidaBiznesi.com dhe Fondacionit të Institutit M & M Ivanaj.
Prezantimi: Si të zhvilloni një biznes me Open Source
Nga idetë e Richard Stallman në zhvillimin e një biznesi open source.
Rreth prezantimit
Nga marsi 1975 deri në dhjetor 1986 anëtarët e Homebrew Computer Club takoheshin në Menlo Park të Kalifornisë për të debatuar rreth pasionit të tyre: zhvillimit, përmirësimit dhe prodhimit të kompjuterave personal. Steve Wozniak (bashkëthemeluesi i Apple), John Draper (një nga hacker-at më të njohur të kohës) dhe Bill Gates (bashkëthemeluesi i Microsoft) ishin disa nga të rinjtë që ndërvepronin me njëri tjetrin gjatë periudhës që klubi ishte aktiv. Në ato kohë shumë pak prej pjesëmarrësve e konsideronin kulturën hacker si problematike, dhe akoma më pak e imagjinonin që pothuajse të gjithë do bëheshin shumë të pasur dhe do rriteshin profesionalisht bashkë me industrinë të cilën ata krijuan nga 0. Nga ana tjetër, numërohen në gishtat e një dore ata që dedikuan jetën e tyre promovimit të programeve free open source dhe etikës në përdorimin e teknologjive që ata vetë krijonin.
Një udhëtim: nga studentët hacker të universitetit MIT në vitet 70, në industrinë gjigande që krijoi Windows dhe nga haktivizmi i Arjen Kamphuis tek blerja e Red Hat nga MIB gjatë prezantimit do mundohemi të gjejmë balancën midis teknologjisë etike dhe sipërmarrjes në fushën e teknologjive free open souce.
Bio: Redon Skikuli
Redoni është një netizen i lindur në Elbasan dhe që aktualisht jeton në 41.3305N,19.7942E. Në vitin 2012 ai bashkëthemeloi Open Labs hackerspace dhe në vijim u angazhua në iniciativa si Open Source Conference Albania, Wiki Loves Monuments, CryptoParty Tirana, CopyFest Durrës dhe projekte të tjera që lidhen me kulturën e shpërndarjes dhe promovimit të dijes së hapur.
Për më shumë se gjysëm dekade ai kontribuon vazhdimisht në projekte open source si OpenStreetMap, Wikipedia, ndërkohë që prej disa vitesh është Mozilla Tech Speaker. Profesionalisht ai është anëtar i Collective68, ku ofron shërbime profesionale dhe cilësore rreth teknologjive open source, platformave open data si dhe privatëcisë në ndërmjet (aka internet).
Audienca – Ky prezantim i drejtohet:
- të gjithë të rinjve që dëshirojnë të zhvillohen profesionalisht në fushën e programimit;
- të rinjve që dëshirojnë të krijojnë sipërmarrjen e tyre në fushë e teknologjisë dhe informacionit;
- të rinjve (në shpirt dhe moshë) që kanë një biznes dhe dëshirojnë të rriten bashkë me një industri që ka nevojë për vizioni dhe pasion;
- bizneseve dhe sipërmarrësve që dëshirojnë të krijojnë një sipërmarrje duke përdorur teknologji free open source.
