Nëse synoni t’i sillni dhe mbani vizitorë në faqen tuaj, atëherë ky shkrim shqyrton një nga teknikat se si t’i bëni shkrimet më ndëraktive për vizitorët tuaj.

Formati i zakonshëm i një shkrimi në internet është një tekst bazë i shoqëruar me një apo disa elemente shoqëruese (kryesisht një foto) që ilustrojnë apo mbështet subjektin e shkrimit. Ky është formati dominues aktualisht.

Nuk mendoj se ky format duhet ndryshuar detyrimisht por ideja e ‘shkrimit ndëraktiv’ orientohet nga ndërthurja dhe ndërveprimi i këtyre elementeve në mënyra që ju lejojnë ta bëni shkrimin më interesant apo tërheqës për lexuesit dhe klientët tuaj.

Trupëzimi apo ‘embeding’ – është një teknikë relativisht e thjeshtë që ju lejon të krijoni shkrime ndëraktive për faqen apo blogun tuaj. Kjo teknikë konsiston në vendosjen e fotove, videove, tabelave, hartave apo elementëve të tjerë vizualë e teknik për t’i bërë shkrimet më tërheqës, interesant, stimulues apo thjesht zbavitës.

Shini edhe këto shembuj shkrimesh nderaktive nga The Guardian apo New York Times visual stories & graphics

[ Synimi kryesor i një shkrimi ndëraktiv është rritja e angazhimit të lexuesit brenda faqes tuaj. ]

Shkrimet ndëraktive ju ndihmojnë t’i shtoni vlerë faqes tuaj për ta kthyer atë në burimin kryesor të informimit të vazhdueshëm dhe kontaktit direkt me lexuesit apo klientët tuaj.

Në të kundërt, lexuesit e ndjekësit tuaj qëndrojnë lehtësisht të shpërndarë nëpër platformat e ndryshme sociale. Por kujdes, platformat sociale nuk janë nën kontrollin tuaj dhe për më tepër e mbajnë peng (kontrollojnë) marrëdhënien me ndjekësit tuaj edhe pse ju mund të ndiheni shumë të lumtur në to!

Sebepi i një aktiviteti për të krijuar një shkrim ndëraktiv

Në fund të majit 2017 isha në një konferencë mjaft interesante, që njihet si Spark.me nën sloganin “Where Business Meets Digital Inovation” – mund të përkthehet si ‘vendi ku biznesi takohet me novatorizmin dixhital’.

Nisur nga dëshira për ta dokumentuar disi aktivitetin vendosa të bëj foto & video të folësve për t’i postuar shumë prej tyre në Instagram, Facebook dhe Twitter – nëpërmjet aplikacionit të Instagram-it në celularin tim. Janë pikërisht këto postime që do t’i përdorim si shembuj të teknikës së trupëzimit (embed) brenda këtij shkrimi.

Si ndryshojnë postimet e trupëzuara nga formatet e tjera

Për ta kuptuar disi më mirë vlerën e kësaj teknike brenda një shkrimi, më poshtë do tre formate se si përmirësohet vlera e vetë shkrimit duke përdorur teknikën e trupëzimit.

Besoj se është lehtësisht e dallueshme se cili nga formatet është më ndëraktiv dhe tërheqës për lexuesit e faqes tuaj:

 Formati i parë  – vetëm linqe fotosh ose dokumentesh

Ky format është baza e funksionimit të vetë internetit – lidhja i një dokumenti/fotoje me hyperlink nga një faqe në një tjetër. Në këtë rast shkrimi nuk do të pasurohej shumë nga vendosja e linqeve të fotove.

• Postimi në Instagram
• Postimi në Facebook
• Postimi në Twitter

 Formati i dytë  – thjesht foto të aktivitetit

Aktualisht, ky është edhe formati dominues për shumicën e medias së shkruar në internet dhe është një bazë e shëndetshme dhe e qëndrueshme. Por synimi është ta ngremë nivelin e angazhimit që mund t’u ofrojmë lexuesve tanë duke i përfshirë ata duke shfrytëzuar edhe platformat sociale ku ata mund të preferojnë të qëndrojnë shumicën e kohës.

 Formati i tretë  – postime të trupëzuara brenda shkrimit

Ky është formati apo teknika që po ju prezantojmë. Ky format ju lejon të shfrytëzoni platformat sociale për t’i rritur vlerën shkrimit dhe faqes tuaj pa i larguara lexuesit drejt mediave sociale.

Njëherazi, ju lejon të ofroni një eksperiencë gjithëpërfshirëse brenda faqes tuaj.

Kjo teknikë kërkon ca më shumë punë për t’u përgatitur por në të njëjtën kohë ju lejon të ofroni shkrime me më shumë thyerje kundrejt formateve shabllone.

Postimi në Instagram

Prezantimi i parë ishte nga Dr. Max mbi: Shaping Your Future Inovacion+Strategy+Now is Psychology #sparkme

A post shared by Elvis Plaku (@elvisplaku) on May 29, 2017 at 3:35am PDT

Postimi në Facebook

Postimi në Twitter

Prezantimi i parë ishte nga Dr. Max mbi: Shaping Your Future… https://t.co/7kXmk8lqUK

— Elvis Plaku (@eplaku) May 29, 2017

Mediat sociale ofrojnë shumë ndëraktivitet dhe funksione, por zakonisht ato e kufizojnë ndërveprimin në disa veprime bazë si ‘pëlqimi, shpërndarja, komentet, etj.’ që sigurisht funksionojnë mjaft mirë për të mbajtur të lartë angazhimin e lexuesve aty.

Por ju mund t’i shfrytëzoni të njëjtat teknika edhe për shkrimet në faqen tuaj si dhe t’u ofroni lexuesve tuaj një shumëllojshmëri prezantimesh dhe formatesh angazhuese. Në fund të ditës, kur ju kuroni e kujdeseni për prezantimin e shkrimeve tuaja, që ato të jenë ndëraktive, ju i shtoni vlerë faqes dhe marrëdhënies me lexuesit e klientët tuaj. Kjo vlerë është akumulative, pra shtohet me kalimin e kohës. Mbi të gjitha është një eksperiencë që e menaxhoni të gjithën ju!

Çfarë mënyrash apo teknikash të tjera sugjeroni për ta bërë një shkrim më ndëraktiv?

Përshëndetje miq,

Që nga lancimi i anketës tonë për aplikacionet dhe softet që përdorni, disa prej jush kontribuuan me sugjerimet e tyre dhe ju jemi vërtetë mirënjohës. Po, po, e kemi fjalën për Matielin si financier, Redonin konsulent teknologjish, Besnikun si Graphic/Motion Designer.

Por nuk do donim të ndalonim me kaq, ndaj ju ftojmë edhe një herë për të dhënë kontributin tuaj duke na treguar për aplikacionet/softet që përdorni rregullisht si profesionistë dhe sipërmarrës.

Shkoni këtu => Anketë: Çfarë aplikacioni/programi përdorni për të qenë prodhimtarë?

Dy konferenca

Fundjavën e ardhshme, në Tiranë, do të zhvillohet edicioni i 4të i OSCAL (Open Source Conference Albania). Kjo është konferenca vjetore që zhvillohet në Shqipëri me synim promovimin e teknologjive me kodburim të lirë dhe të hapur.

Personalisht do jem duke drejtuar një prej punëtorive (workshops) mbi automatizimin e marketingut nëpërmjet softit me të cilin edhe ju vjen edhe ky buletin i përjavshëm – Mautic.

Për më shumë informacion dhe për t’u regjistruar, vizitoni faqen zyratare => https://oscal.openlabs.cc

Konferenca tjetër Spark.me zhvillohet në fakt në Budva në datat 29,30 maj dhe etiketohet si vendi ku “biznesi takon inovacionin dixhital”. Ju ftojmë ta konsideroni pjesëmarrjen sipas dëshirës dhe prirjeve tuaja.

Për më shumë informacion vizitoni => https://spark.me/2017/

Webinari ynë i parë

Kemi ca kohë që përgatitemi të lançojmë një rubrikë tërësisht të re këtu në SfidaBiznesi.com

Konkretisht bëhet fjalë për rubrikën e Webinareve, apo seminaret online.

Rubrika synon të rimishërojë frymën dhe vizionin e SfidaBiznesi.com (këshilla praktike për profesionistë dhe sipërmarrës si ju) me një format disi më ndërveprues e mbase më zbavitës.

Është diçka tërësisht e re që po ofrojmë dhe shpresa që do arrijmë t’i japim formën dhe formatin e duhur për të jetë sa më me vlerë për ju.

Do t’ju dërgojmë një mesazh të dytë për t’ju njoftuar për datën dhe detaje të tjera.

Ju urojmë një fundjavë të mbarë!

Si pjesë e trajnimit për marketingun strategjik në internet prekëm disi atë që ekspertët prej vitesh e kanë quajtur ‘udhëtimi i klientit’. Në fakt koncepti i ‘udhëtimit të klientit’ është një fushë e tërë dhe një paradigmë e cila ka fuqinë për ta transformuar mendësinë dhe operimin e çdo lloj biznesi/organizate në funksion të krijimit të një eksperience vërtetë cilësore e me vlerë për të dyja palët: klientët dhe biznesin.

Po citoj një shkrim të revistës së mirënjohur Harvard Business Review që ju ftoj ta konsumoni të plotë kur t’ju jepet mundësia:

“Shpërthimi i teknologjive dixhitale në këtë dekadën e fundit ka krijuar konsumatorë “të fuqizuar” me ekspertizë të atillë që falë përdorimit të mjeteve dhe informacionit në dispozicion janë në fakt vendimmarrësit pasi arrijnë të gjejnë atë që duan, kur e duan dhe që t’ia dorëzojnë në derë me çmimin më të ulët.

Për t’iu përgjigjur këtij trendi, shitësit me pakicë dhe ofruesit e shërbimeve janë turrur për të zhvilluar më tej aftësitë e tyre për analitiken (analytics) dhe morinë e të dhënave (big data) me qëllim për të kuptuar edhe më mirë klientin e tyre dhe kështu për të marrë sado pak kontroll mbi këtë situatë.

Në shumicën e kohës kompanitë kanë qenë në pozicionin reagues ndaj klientëve duke u përpjekur që t’i paraprinë prirjeve të reja dhe për ‘ua pozicionuar në udhën e klientëve të tyre ndërsa ata përshkojnë rrugën e vendimmarrjes nga konsiderimi te blerja.

Por tani, falë shfrytëzimit të teknologjive, proceseve dhe strukturave të reja organizative, kompanitë po e rikthejnë balancën e pushtetit duke krijuar kështu një vlerë të re për brandet dhe blerësit.

Janë pikërisht marketierët ata që po i menaxhojnë ‘udhëtimet e klientëve’ ashtu siç ata bëjnë edhe për produktet.

Rrjedhimisht, ‘udhëtimet e klientit’ po kthehen në thelbin e eksperiencës së çdo klienti me një brand të caktuar – madje aq e rëndësishme sa edhe vetë produktet vetë duke u kthyer kështu në një avantazh konkurrues.

Ndryshe nga strategjitë shtrënguese/detyruese që kompanitë përdornin para një dekade për t’i mbajtur klientët të mbyllur (p.sh. kompanitë mobile me kontratat e shërbimit), udhëtimet e reja të klientëve dalin me sukses sepse ato arrijnë të krijojnë vlerë për klientët tuaj: Pra, klientët qëndrojnë me ju pasi ata përfitojnë nga vetë udhëtimi (eksperienca).” Burimi: Competing on Customer Journeys

Pyetje: Si po e transformoni ju ‘udhëtimin e klientit’ në kompaninë/organizatën tuaj?

Si pjesë e trajnimit katër orësh mbi Marketingun Strategjik në Internet ishte edhe diskutimi mbi tre kategoritë orientuese për marketingun dixhital.

Përkufizimi i këtyre tre kategorive ju ndihmon të kuptoni se si mund t’i gruponi e menaxhoni më mirë kanalet e ndryshme dixhitale. Më tej, ato ju orientojnë për t’i dhënë prioritet mediave që përputhen më mirë me nevojat dhe burimet e biznesit/organizatës tuaj online.

Kategorizimet nuk janë të domosdoshme por kur kuptoni dallimet mund të qartësoheni edhe mbi mënyrën se si duhet të orientohet strategjia e marketingut tuaj në internet.

Cilat janë ato?

Kanalet e marketingut dixhital mund kategorizohen si medie të ndara në:

• Mediat me pagesë (Paid)
• Mediat e fituar (Earned)
• Mediat në pronësi (Owned)

Secila prej këtyre medieve ka rëndësinë dhe peshën e vetë, por një ndër synimet e marketingut tuaj strategjik duhet të jetë përqendrimi e njëherazi rritja e vlerës së mediave ‘në pronësi’ kundrejt dy medieve të tjera. Aryeja kryesore është fakti që ju nuk keni kontroll të plotë mbi dy të tjerat!

Media me pagesë

Mediet me pagesë, siç mund të kuptohet edhe nga emri, janë ato kanale apo medie të cilat ju i përdorni kundrejt pagesës. Kryesisht bëhet fjalë për reklamat e ndryshme që ju mund të bëni në internet apo nëpërmjet platformave si Facebook Ads, Google Ads, LinkedIn, etj., por sigurisht që këtu përfshihen edhe reklamat në faqet e medieve të ndryshme si gazeta, revista, portale, etj. Pra ju paguani që të reklamoni brand-in apo promovoni fushatën e biznesit/organizatës tuaj duke shfrytëzuar medien dhe audiencën e dikujt tjetër.

Media e fituar

Kjo medie, në një mënyrë apo një tjetër, i shton vlerë biznesit/organizatës tuaj duke rritur dijeninë, prestigjin e brandit apo produkteve/shërbimeve tuaja. Media e fituar ju referon (sjellë) klientë dhe vizitorë në median tuaj në pronësi. Por, gjithashtu ju lejon të ndërtoni një bazë ndjekësish, zakonisht brenda platformës së dikujt tjetër. Si shembuj kryesorë mund të përmendim Facebook-un, Instagram-in, etj. Këtu futen edhe shkrimet apo përshtypjet që shkruhen duke iu referuar biznesit/organizatës tuaj.

Pse Facebook-u apo Instagrami nuk janë tuajat? Ju mund të thoni se organizata/biznesi im ka fansat e vetë në Facebook, pra ju mund t’i konsideroni ata si ‘pronë’ e juaja! Po në fakt kush është ‘pronari’ i vërtetë i Facebook-ut, ju? Pra të gjithë jemi ‘qiraxhi’ në këto lloj platformash sociale ose jo dhe ‘qiraja’ jonë mund të mbarojë në çdo moment!

Media në pronësi

Kjo medie është ajo që ju realisht e zotëroni! Pra nuk është tërësisht në vartësi të një shërbimi apo platforme tjetër si Facebook-u. Faqja juaj zyrtare është medie në pronësinë tuaj. Po ashtu janë lexuesit, lista e abonentëve tuaj me email, aplikacioni juaj mobil, etj. Këto lloj mediesh kanë koston e vetë dhe kërkojnë resurse për t’u mirëmbajtur, por në fund të ditës ato janë nën zotërimin tuaj. Ndaj, synimi juaj strategjik dhe afatgjatë duhet të jetë forcimi dhe shfrytëzimi sa më i mirë i këtyre medieve.

A jeni dakord me këto kategorizime? Çfarë mendoni se mungon apo duhej përkufizuar ndryshe?

Imagjinoni për një moment. Dikush vjen të vizitojë faqen e biznesit/organizatës tuaj për herë të parë, ose mbase edhe për herë të dytë. Ai/ajo qëndrojnë ca kohë për t’u larguar pastaj pa lënë gjurmë ose mbase edhe me idenë se do rikthehet në një të ardhme të pacaktuar!

Pra, ai ‘dikushi’ është thjesht njëri prej atyre që i quajmë ‘vizitorë anonimë.’

Ai apo ajo mbeten ‘anonim’ sepse ju zakonisht nuk keni asnjë të dhënë apo mundësi rikontaktimi me ta.

Për ju, ‘anonimët’ mbeten një statistikë e Google Analytics që ju tregon se këtë muaj kishit p.sh. 2,000 vizitorë nga të cilët X përqind ishin të rinj (New Vistor) dhe X përqind u rikthyen (Returning Visitor), por që praktikisht mbeten të gjithë anonimë sepse ju nuk keni një strategji si t’i filtroni, identifikoni dhe t’i riktheni nëse ata janë klientët/vizitorët tuaj potencialë.

Sfida e parë: 50% deri në 85% e vizitorëve nuk rikthehen!

Studimet vërtetojnë se 50% deri në 85% e vizitorëve të faqes tuaj zakonisht ju vizitojnë vetëm një herë për mos t’u rikthyer më! Kjo shpesh është normale por nuk duhet të mbetet kështu gjithmonë!

Për të sjellë rregullisht vizitorë në faqen tuaj mund t’ju duhet të bëni vazhdimisht fushata me reklama (promocion) dhe nëse nuk adoptoni një sistem apo strategji për t’i rikthyer me kosto më të ulët, atëherë gjasat janë që edhe në të ardhmen do t’ju duhet të harxhoni sërish të njëjtën shumë parash për t’i reklamuar të njëjtit grup ose një grupi të ri vizitorësh/klientësh potencialë që si përqindje do ju vizitojnë vetëm një herë.

Sfida e dytë: Duhen 7 deri në 20 ekspozime për t’i bindur të blejnë!

Sfida tjetër që keni është fakti se sipas mjaft studimeve një klienti potencial i duhen 7 deri në 20 ekspozime ndaj një produkti apo shërbimi të caktuar për të arritur momentin kur ai/ajo mund të marrin një vendim për të blerë ose jo. Sigurisht, numri i ekspozimeve të nevojshme ulet kur ata fillojnë të familjarizohen dhe besojnë në ‘brandin’ tuaj, por është detyra juaj t’i bindni të blejnë ose të paktën të rikthehen disa herë për të krijuar më shumë besim në brandin tuaj.

Një ilustrim i thjeshtë!

Nëse ju keni një dyqan këpucësh me vitrinë në anë të rrugës ju mund të keni mjaft klientë potencialë që kalojnë çdo ditë pranë vitrinës tuaj por sigurisht shumica janë thjesht kalimtarë pra ajo masa prej 50% deri në 85%. Ndërkohë, ajo përqindja e personave të interesuar nuk bindet të blejnë gjë pasi zakonisht iu duhen të paktën 7 deri në 20 ekspozime.

Ndërkohë, vetëm një përqindje shumë e vogël tregon vërtetë interesim pasi futet brenda në dyqan dhe madje fillon të shohë për ndonjë palë këpucë, por nuk i blen menjëherë por e lë për një herë tjetër. Ama, tani, ju e dini se ai/ajo është një klient potencial pasi treguan interesim dhe madje tani e tutje ju keni mundësi ta identifikoni nëse futet sërish në dyqanin tuaj.

(TIP – numri i ekspozimeve është në raport të drejtë me vlerën e produktit/shërbimit, pra sa më i lartë çmimi i produktit/shërbimit aq më i madh duhet të jetë edhe numri i ekspozimeve)

Në botën virtuale, është një eksperiencë e ngjashme, pasi sigurisht shumica e vizitorëve janë kalimtarë, nga këta vetëm një pjesë e vogël janë vërtetë vizitorë potencialë dhe nga ky grup dalin pikërisht ata që janë ekspozuar apo bindur mjaftueshëm të blejnë shërbimin/produktin tuaj.

Sfida e tretë: Identifikimi dhe ndjekja e vizitorëve/klientëve të interesuar

Bazuar edhe në ilustrimin e mësipërm, në rastin e vizitorëve të faqes tuaj, bëhet fjalë për atë përqindje të vizitorëve që:

• qëndrojnë pak më gjatë;
• që tregojnë interes duke vizituar disa faqe apo
• që ju kontaktojnë direkt si rrjedhojë e interesimit për shërbimin/produktin që ju ofroni.

Por nëse ju nuk keni një ‘vitrinë’ në anë të rrugës, pra nuk keni shumë vizitorë potencialë, atëherë ju duhet të dilni për t’i gjetur dhe sjellë vetë në vitrinën/faqen tuaj. Më pas sfida mbetet të:

• identifikoni,
• ekspozoni mjaftueshëm dhe
• bindni atë përqindjen e vogël të klientëve/vizitorëve potencialë.

Ky është edhe një nga funksionet thelbësore të marketingut dixhital. Dhe në rastin konkret këtu do flasim për teknikat e ‘shënjestrimit’ dhe ‘ri-shënjestrimit’ (ndryshe njihen me targeting & re-targeting).

Pjesa e dytë do publikohet së shpejti.  Ju faleminderit të na ndiqni…

Ndërsa viti i ri ka filluar dhe ri-shihni planet apo punët për t’u bërë gjatë vitit mbase e gjeni veten disi dobët nga frymëzimi apo dëshira për të punuar!

Ose mbase jeni tërësisht i/e frymëzuar dhe gati për të filluar punën, fundja keni pushuar, festuar dhe tani jeni me energji të reja!

Cila do qoftë gjendja juaj aktuale, jam i bindjes se rigjetja e ‘fokusit’ do t’ju ndihmojë për ta ngritur nivelin tuaj edhe më lartë.

Sipas autorit të shumëshitur “Simon Sinek” gjithçka duhet të fillojë me pyetjen “pse”!

Rikujtimi i arsyes pse ekzistoni, pse ngriheni çdo ditë nga krevati, pse bëni punën që bëni, pse drejtoni organizatën/biznesin që keni, apo vetë ekzistenca juaj duhet të kulmojë te “pse”-ja.

Ndërsa nisni një vit të ri ju nxis të shihni apo rishihni këtë video frymëzuese titulluar: How great leaders inspire action. Por personalisht besoj se parimet vlejnë për shumë aspekte të jetës tonë personale dhe profesionale!

Nëse nuk jeni mirë me anglishten, shihni me kujdes opsionin për të aktivizuar titrat në gjuhën shqipe.

Fundi i vitit, përveç se si një kohë festimi, duhet rezervuar edhe për të reflektuar mbi arritjet dhe ecurinë e vitit që po kalon.

Ndaj, në kuadër të punës që bëhet me këtë faqe, ku ndër synimet kryesore është afrimi i një rrjeti lexuesish profesionistë, një nga analizat që bëjmë është vetë lexueshmëria e shkrimeve gjatë vitit 2016.

Përmbledhja e mëposhtme është statistikore por nëpërmjet listimit të shkrimeve më të lexuara mund të nxirret edhe një pasqyrë e preferencave apo nevojave tuaja si lexues.

Lista e mëposhtme është përgatitur sipas statistikave të gjeneruara nga Google Analytics, ku kriteri minimal ishte që shkrimet të jenë lexuar të paktën 500 herë, ndërsa shkrimi i parë është lexuar mbi 13,000 herë.

Lexim të këndshëm:

1. Pesë këshilla si të filloni një biznes të suksesshëm
   Këshilla fantastike nga biznesmeni i suksesshëm Richard Brandson.
2. Mësoni si të përdorni MailChimp për marketing me email
   Seri me 5 videoleksione për të filluar marketingun me email.
3. Pse bizneset duhet të bëjnë marketing online (dixhital)?
   Këshilla praktike dhe orientime se nga duhet ta filloni marketingun tuaj dixhital nga Albin Dashi.
4. Dhjetë rregulla mbi veshjen në mjedisin e punës
   Çfarë të vishni në mjedisin e punës dhe disa truke të vogla që të përcillni imazhin e një punonjësi të denjë.
5. Dy karakteristikat e marketingut të suksesshëm 
   Marketingu i suksesshëm minimalisht synon të ndërtojë marrëdhënie nëpërmjet komunikimit me disa kanale dhe kontaktit të rregullt e të vazhduar (kundrejt marketingut sporadik, me rast festash)!
6. Si ndikon interneti në komunikimin tonë?
   Tashmë teknologjia është bërë “palë e tretë” në çdo komunikim që ne kemi me miqtë apo palët në biznes, por sa të kthjellët jemi për mënyrat se si ajo ndikon në transformimin e standardeve tona gjuhësore dhe vetë komunikimit?
7. Respekti dhe komunikimi në biznes 
   Respekti dhe komunikimi me respekt duhet të jenë bazat e marrëdhënieve për një kulturë të shëndetshme biznesi në Shqipëri dhe kudo.
8. 7 mënyra të të menduarit që ju duhen të arrini suksesin 
   Ndërsa reflektoni mbi këto 7 mënyra do arrini të dalloni ku çalon mendësia!
9. Kompjuteri dhe cilësia e jetës! 
   A e bëni do gjithnjë lidhjen se si përdorimi i kompjuterit ndikon te cilësia e jetës tuaj?
10. Fuqia e reklamës shoqërore (sociale) 
    Ky shkrim përmend dy shembuj se si media sociale është përdorur për t’i dhënë zë njerëzve të thjesht!
11. Këshilla për sipërmarrësit e rinj (nga Aftesi.info) 
    Intervista nga ekspertë dhe sipërmarrës të suksesshëm.
12. Shtatë mënyra për të qenë një lider më i mirë në 2016-n 
    Shtatë mënyra se di duhet të mendoni dhe pozicionoheni ndryshe si udhëheqës i biznesit apo organizatës tuaj.
13. 6 gjërat që nuk duhet t’i toleroni në karrierën tuaj 
    Karriera, nevoja për një punë apo mediokriteti nuk duhet të kthehen në justifikime për të toleruar gjërat apo situatat e përmendura në këtë shkrim.
14. 7 mendimet që po ju pengojnë të arrini suksesin
    Pengesa më e madhe mes jush dhe të qenët në kulm të karrierës suaj, jeni vetë ju.

Ca kohë më parë përgatita një shkrim në lidhje me rëndësinë e implementimit të certifikatës së sigurisë me SSL apo përdorimit të HTTPS për sigurinë e faqes tuaj.

Zakonisht, ju mund ta dalloni lehtësisht nëse një faqe në internet e ka apo jo të implementuar çertifikatën e sigurisë pasi mund të dallohet nëpërmjet “s”-së te “http” në adresën e saj. Konkretisht, SfidaBiznesi.com përdor protokollin e sigurisë htts://sfidabiznesi.com për disa arsye përfshi sigurinë, privacinë, listimin në Google si dhe ruajtjen e të dhënave të personave që logohen në faqe.

Prej vitit 2014, (shih video) Google ka ndërmarrë një fushatë të gjerë për të nxitur rritjen e sigurisë online për efekt të sigurisë dhe privacisë. Ndërkohë, ka njoftuar se tashmë përdorimi ose jo i HTTPS do konsiderohet si një nga faktorët përcaktues për listimin e faqes tuaj brenda këtij motori. Ky njoftim i dha edhe më shumë peshë nevojës për implementimin e një çertifikate SSL veçanërisht për faqet që e gjenerojnë shumicën e trafikut nga motorët e kërkimit ose që duan ta ruajnë listimin aktual edhe në të ardhmen.

Një kujtesë tjetër në lidhje me këtë çështje erdhi nga zhvilluesit e platformës WordPress të cilët theksuan nevojë e kalimit të faqeve në SSL për me daljen e versionit më të fundit të WordPress 4.7. Ndërkohë, edhe themeluesi i WordPress Matt Mullenweg e theksoi këtë fakt në mbledhjen e përvitshme.

Disa sugjerime për ta implementuar çertifikatën SSL për faqen tuaj?

1. Ka mjaft faqe që ofrojnë mundësinë e blerjes së një çertifikate SSL. Zakonisht, kompania ku keni blerë domain-in ju ofron edhe mundësinë e blerjes dhe implementimit të një license SSL për faqen tuaj. Por, bëni kujdes se çmimi i këtyre licensave varion shumë nga kompania në kompani dhe zakonisht ka edhe alternativa më të lira.
2. Personalisht kam blerë disa licensa pranë NameCheap.com pasi është ndër më konkurrueset në çmim por ka edhe një alternativë falas shumë të mirë (Let’s Encrypt) e cila po adoptohet gjerësisht dhe mund të jetë e gatshme brenda panelit të administrimit të hostit tuaj, zakonisht të gjitha hostet që ofrojnë cPanel e kanë brenda si p.sh. të gjitha hostimet e ofruara nga WebHost.al e ofrojnë brenda paketës së hostimit.
3. Nëse nuk jeni në gjendje ta implementoni vetë, atëherë mund të gjeni dikë që ta bëjë këtë për ju, kuptohet kundrejt një pagese për të cilën duhet të bini darkord paraprakisht.
4. Nëse ju e keni implementuar sakaq certifikatën SSL në faqen tuaj, atëherë mund të përdorni shërbime si Qualy’s SSL Labs për të verifikuar që është implementuar në rregull.

Keni sugjerime të tjera, atëherë mos nguroni t’i ndani me ne te komentet këtu poshtë.